Minsitra Saúde, Odete Maria Freitas Belo hateten haree husi  alokasaun médiku sira ne’e seidauk sufisiente, tanba iha Timor suku barak, entaun iha politika Ministériu Saúde nian kada suku tenke postu saúde ida, entaun ida ne’e seidauk sufisiente.

“Husi médiku na’in 24, na’in 16 médiku jerál ne’ebé sei koloka ba iha  postu saúde no médiku Dentista na’in 8 mak sei hala’o servisu iha Hospitál Referál inklui Sentru Saúde Ermera na’in ida,” nia hateten iha Palasiu Sinzas, Segunda (30/05).

Ministra Saúde ne’e fo mensazen ba médiku hirak ne’e, hanesan servidór ba nasaun, tenke utiliza matenek no sentidu dedikasaun umanu, hodi promove prinsipiu no valores denteolojiku no konsulta profisional hodi kontribui ba esforsu tomak ne’ebé MS halo.

“Nune’e, bele promove no hetan konfiansa husi populasaun, komunidade no familia tomak iha servisu saúde nasionál. Tanba ne’e mak tenke konserva tempu, enerjia fiar metin ba interese komun nian,” nia hateten.

Nia husu ba médiku hirak ne’e atu nafatin korazen no prontu enfrenta dezafius no obstakulu hotu iha atividade lor-loron nian iha profisaun ne’e rasik, tanba identifikasaun fatin ne’e MS hili iha área rurál tebes-tebes.

Iha fatin hanesan, Prezidente Komisaun Funsaun Públika (KFP), Faustino Cardoso Gomes hateten, husi hatais unifome mutin ne’ebé médiku sira hatais, reprezenta ona ondra ne’ebé hanesan profisionál saúde no tenke asumi ho loloos.

“Tanba ne’e, bainhira hala’o knaar tenke ho responsabilidade no hakruuk nafatin ba iha saída de’it, nune’e kompeténsia ne’ebé ema ida-idak iha bele hala’o ho di’ak no másimu liu tan,” nia fó hanoin.