"Dekretu lei ne'e ho objetivu hodi estabelese kompeténsia sira, kompozisaun no funsionamentu husi Komisaun Nasionál Desportu (KND)," dehan Ministru Prezidensia Konsellu Ministru, Fidelis Leite Magalhães, iha Palasiu Governu, kuarta ne'e (06/07).
Nia hatutan, Projetu Dekretu-Lei ida-ne’e hodi revoga Dekretu-Lei n. 39/2011, loron 21 fulan-setembru, ne’ebé regula KND no kria estrutura foun no enkuadramentu ba KND nian, nune’e mós delimita ninia kompeténsia sira, kompozisaun no funsionamentu hodi kontinua ho prosesu dezenvolvimentu prátika desportiva iha Timor-Leste.
Nia esplika, alterasaun dahuluk ba Dekretu-Lei n. 18/2019, loron 11 fulan-jullu, ne’ebé aprova ona Orgánika Sekretaria Estadu Juventude Desportu. Projetu dekretu-lei ida-ne’e ho objetivu atu adekua orgánika ministériu ida ne’e nian, ne’ebé estabelese ona iha dekretu lei n. 30/2020, loron 29 fulan-jullu, kona ba organizasaun administrasaun direta no indireta estadu nian.
“Hakarak mós adekua ba prosesu deskonsentrasaun no desentralizasaun ne’ebé la’o hela, hodi promove armonizasaun ida entre responsabilidade no kompeténsia administrativa sira ne’ebé pertense ba servisu sentrál sira husi Sekretaria Estadu Juventude no Desportu. Prevee ezisténsia diresaun jéral ida deit ba juventude no desportu no re-estruturasaun no agrupamentu ba unidade no diresaun nasionál balun," tenik nia.
