Xefe Suku Home, Luis do Santos Maubano, hatete, durante tinan neen nia laran kanalizasaun bee ne'ebé kompañia halo la sufisiente ba komunidade sira, entaun komunidade refere deside buka meius rasik, kee bee posu hodi asesu.
“Bee iha Suku Home sai forsa, maibé ekipamentus hanesan torneira, besi no tanke, ne'ebé kompañia uza ba kanaliza bee ne’e mak laiha kualidade, tan ne'e mak komunidade sira falla bebeik ba bee moos no ikus mai sira foti desizaun ida-idak kee bee posu hodi asesu,”dehan nia ba Online INDEPENDENTE, foin lalais ne’e.
Nia hatutan, realidade kompañia husik hela todan ba komunidade sira, tanba ne'e husu ba Ministeriu Obras Publikus (MOP) no Prezidente BTL.EP atu halo Kooperasaun diak, nune’e bainhira kompañia hetan tenederizasaun bele iha kualidade ekipamentus hodi bele hatan no uza ba tempu naruk.
Nia haktuir, komunidade sira asesu deit bee posu tanba, ekipamentus sira hanesan, torneira, besi, tanke no seluk tan la funsiona hotu, no mós liña kanalaizasaun bee la seguru.
Entretantu, komunidade Agapito Gonsalves afirma, maske iha tinan 2016 governu liu-husi kompañia Bayu Sistem, mai iha suku refere halo ona kanalizasaun bee moos, maibé ekipamentus bee nian ladun iha kualidade no paradu.
Tanba ne'e, komunidade sira iha suku refere la asesu ba bee moos ne’ebé komapañia konstrui iha tinan hirak liu ba no komunidade sira uza deit bee posu.
“Ema hotu presiza bee moos no ema moris bainhira iha bee, se laiha bee mak ema sei mate,”dehan nia.
"Ha’u rasik iha inisiativa atu kee bee posu ida ne'e hodi asesu ba bee, tanba desizaun moris iha ema ida nia liman rasik, nia haktuir.
Tuir observasaun Jornalista Online INDEPENDENTE, iha terenu nota katak, tanke no torneira ne'ebe kompañia instala ladiak hotu no la funsiona.
Entretantu, tuir dadus, total xefe familia iha Suku Home, hamutuk 2.278.
