MEJD Reativa Ensinu Aprendijazem Prezensial Iha Munisipiu Dili-Baucau Featured

By Rufino Dos Santos Barreto Jullu 15, 2021 536
Estudante sira. Foto:Dok/Independente. Estudante sira. Foto:Dok/Independente.

DILI: Ministeriu Edukasaun Juventudi no Desportu (MEJD) kinta ne’e (15/07) anunsia ona, atu reativa fali ensinu aprendijazem prezensial iha Munisipiu Dili no Baucau.

Ministru Edukasaun Armindo Maia hatete, MEJD foti ona desizaun hodi reativa fali prosesu ensinu aprendijazem prezensial iha Munisipiu rua ne’e, tanba ba kazu foun Covid-19 kada loron menus.

Nune’e, haree mós ba tasa vasinasaun entre professor no funsionariu sira ne’ebé atinji ona pursentu 60.

“Ita deside hodi reativa fali ensinu aprendijazem prezensial iha eskola Baucau no Dili,”dehan nia iha sala konferensia MEJD, Vila-Verde Dili, kinta (15/07).

Tanba ne’e, Governante ne’e husu ba professor no estudante sira bainhira prosesu aprendijazem la’o, nafatin tuir protokolu Oganizasaun Mundial Saúde (OMS) nian hodi prevene kontajiu moras Covid-19.

Entretantu, tuir dadus total professor iha Kapital Dili hamutuk 3,157 husi numeru ne’e sira ne’ebé simu ona vasina hamutuk 1,498 (47%) no ida ne’ebé seidauk vasina hamutuk 1,655 (53%).

Aleinde, iha Munisipiu Baucau total professor hamutuk  1,140, husi numeru ne’e, na’in 669 (58,7%) mak simu ona vasina.

Ho nune’e, tuir dadus total estudante iha Kapital Dili hamutuk 54,743 no Baucau 28,654.

Enkuantu, eskola ne’ebé preparadu ona kondisaun atu reativa hamutuk 99.

 

Asistente Editor: Saturnina da Costa

 

 

Rate this item
(0 votes)

Independente Digital TV