Iha proposta Orsamentu Jeral Estadu (OJE) 2023, Rejiaun Administrativu Espesial Oekusse-Ambeno (RAEOA) ne’ebé lidera husi Prezidente Autoridade Arsenio Paixao Bano, propoin orsamentu hamutuk millaun $120.
Husi total orsamentu ba RAEOA ne’e, millaun $84 sei utiliza ba administrasaun iha RAEOA no millaun $36 ba Fundu Espesiál ba Dezenvolvimentu (FED). Husi millaun $36 ba FED ne’e inklui rihun $32 ne’ebé sei aloka ba formasaun ba futuru tripulante ró Haksolok.
"Formasaun tripulasaun ba embarkasaun Haksolok," hakerek iha livru Dezenvolvimentu Orsamentál 2023 ne'ebé Jornál INDEPENDENTE asesu husi portál tranparénsia Ministériu Finansa, Domingu (09/10).
Orsamentu ho montante rihun $32 ne’ebé RAEOA preve iha rúbrika (FED) ba tinan fiskál 2023 ne’e ho kódigu 315 (Outros Tipos de Formação), sub-programa ho kódigu 31520 (Outros Tipos de Formação-RAEOA).
Atividade husi programa ne'e ho kódigu 1277 kona-ba Formação da Tripulação para a embarcação "Haksolok", ho orsamentu kódigu E04 kona-ba akizisaun servisu korrente, ho montante $32,000.
Ba kestaun ne’e, Vise Reitór Datoluk Universidade Dili (UNDIL), Hugo Lourenço da Costa preokupa ho ro Haksolok ne’ebé estadu Timor-Leste gasta ona osan barak maibé to’o ohin loron seidauk iha serteza.
"Tinan 2020 husu orsamentu adisionál millaun $14, kuaze millaun $20 resin ba Ró Haksolok ne'e. Ró ne'e mate klamar ida tanba osan ne'ebé mak gasta ona se ita halo ró hanesan Berlin Nakroma, bele halo tolu," dehan nia iha nia knar-fatin, Maskareñas, Sesta (07/10).
Nia dehan, osan ne’ebé gasta ne'e povu nian, tan ne’e loloos ró Haksolok tenke mai ona, tanba prosesu konstrusaun ba ró refere halo tinan lima resin ona.
"Husu osan hela de'it, maibé hanusa ró nunka mais finaliza ninia konstrusaun."
Iha fatin ketak, Membru Assembleia Konstituinte, Alexandre Corte-Real "Nau-Pai Beram" hatete, tenke iha justisa ba ró Haksolok, tanba estadu gasta ona osan boot maibé to'o ohin seidauk to'o Timor-Leste.
"Loloos ne'e ita sosa ró ahi rua ka tolu, maibé osan ne'e gasta, laiha follow up ida, maibé ida ne'e osan públiku nian Autoridade RAEOA tenke responssbiliza," dehan nia.
"Ida ne'e servisu Komisaun Anti Korrupsaun, servisu prokuradór jerál nian atu hatene, tanba estadu gasta ona osan barak ba ró ne'e.”
