Kordenador Forsa Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo, hatete, iha loron 28 Outubru SIJK la deteta kazu positivu foun, maibé rejista kazu mate ida.
Nune’e, iha munisipiu 7 ho RAEOA laiha ona kazu ativu no munisipiu 5 sei iha kazu esporádiku.
Enkuantu, iha loron ne’e, SIJK rejista mós kazu rekuperadu hamutuk na’in 5.
Ba kazu mate, Rui esplika, sidadaun feto ida ho idade 38 hela iha Dili no hetan ona vasina doze kompletu, diagnóstikadu ho sindroma insufisiésia respiratoria aguda (SIRA) tanba Covid-19 iha loron 24 Outubru 2021.
Matebian hetan mós moras ho problema defisiénsia imunidade. Iha loron ne’e kedas pasiente hala’o tratamentu iha Izolamentu Lahane, no iha loron 28 Outubru 2021 madrugada, iha tuku 03:15 pasiente hakotu-iis.
“Familia kolabora ho ekipa saúde hodi hala’o funeral tuir protokolu ne’ebé adopta iha Timor-Leste,”
Iha loron 29 Outubru, kazu positivu foun hamutuk na’in 2, kompostu husi Munisipiu Baukau iha kazu ida no Bobonaro kazu ida. Kazu sira ne’e hotu, hatudu sintomas.
Iha loron 30 Outubru, deteta kazu positivu foun na’in 2, husi Kovalima iha kazu ida no Vikeke iha kazu ida. Husi kazu sira ne’e hotu hatudu sintomas.
“Iha loron 31 Outubru, deteta kazu ida iha Kapital Dili, aleinde ne’e, SIJK mós rejista kazu rekuperadu na’in 7,”dehan nia iha komunikadu ne’ebé Online INDEPENDENTE asesu, domingo ne’e (31/10).
Kazu ativu ne’ebé hela iha Izolamentu hamutuk na’in 40.
Ho nune’e, total komulativu kazu konfirmadu sura husi loron 21 fulan-Marsu tinan 2020 to’o loron 31 Outubru 2021 hamutuk 19.790.
Enkuantu, tuir dadus husi SIJK, total ema ne’ebé mate ho Covid-19 iha Timor-Leste hamutuk na’in 122.
