LABEH Husu MS Publika Numeru Vasina Sidadaun Kada Loron

By Gregorio da Costa Agostu 25, 2021 219
Ema ho Defisiensia simu vasina iha salaun ADTL maskarenhas Dili. Foto:Dok/Independente. Ema ho Defisiensia simu vasina iha salaun ADTL maskarenhas Dili. Foto:Dok/Independente.

DILI: Diretór Ezekutivu Lalenok ba Ema Hotu (LABEH), Crystoper Henry Samson, husu ba Ministeriu Saúde liu husi Sentru Integradu Jestaun Krize (SIJK) atu públika numeru populasaun sira ne’ebé simu ona vasina kada loron.

Nune’e, LABEH husu Governu maibé tenke halo esforsu maka'as no muda estratejia hodi koalia sai numeru vasina kada loron no labele hare liu ba kazu positivu.

“Ita labele loron-loron koalia deit variante delta no positivu Covid-19, ida ne’e halo populasaun tauk atu hakbesik-an ba simu vasina, maibe ita halo sosializasaun kona ba vasina no fó sai mós numeru vasinasaun ba sidadaun sira ne’ebé simu ona vasina ne’e, loron ida ema na’in hira ",dehan nia konferensia imprensa, iha edifisiu LABEH Komoro, Dili, kuarta ne’e (25/08).

Tanba ne’e, nia konsidera laiha dalan seluk, maibé liu husi vasina mak bele hasa’e imunidade ema ida-idak nian.

Nune’e, nia husu nafatin ba Ministeriu Saúde no ekipa sira atu kontinua sensibiliza kamapaña vasinasaun ba sidadaun sira atu labele tauk hakbesik-an ba postu saúde sira atu simu vasina.

Tuir nia, iha nasaun barak mak ladun koalia ona kona ba kazu positivu Covid-19, maibé sira prekupa liu oinsa ema hira mak atu simu vasina kada loron. Nune’e, bainhira sidadaun tauk nafatin atu ba vasina mak Governu sei falla iha prosesu ne’e.

“Nasaun lubun bo’ot mak livre ona ba moras ne'e, liu husi vasinasaun tanba sa ita nasaun ki'ik no populasaun oituan ita labele?,”tenik nia.

Entretantu, iha komunikadu ne’ebé fó sai husi Ministeriu Saúde liu husi palasiu das Cinzas, kada loron fó sai numeru populasaun ne’ebé elezivel hahú husi tinan 18 ba leten iha teritoriu laran tomak, ne’ebé simu ona vasina to’o ohin loron 25 fulan-Agostus ho doze dahuluk hamutuk 375,602 (47.8%) no doze daruak 181,975 (24.1%) ho total vasina ne’ebé fó ona hamutuk doze 544,175.

 

Asistente Editor: Saturnina da Costa

Rate this item
(0 votes)

Independente Digital TV