Apela husi autoridade ne’e relasiona ho komunidade balun iha munisipiu Ermera ne’ebé la kompleta vasina bainhira asu tata.

Diretór Servisu Saude Munisipiu Ermera, Antonio de Jesus informa, durante ne’e komunidade balun iha munisipiu Ermera ne’ebé asu tata la simu kompletu vasina tuir estrandarte ne’ebé iha.

"Iha ita-nia komunidade balun asu tata, sira iha entrese atu lori ba sentru saúde par hetan vasina kompletu tuir padraun ne'ebé mak iha. Mais iha balun asu tata tiha hotu mai vasina de'it dala ida no dala rua, la kohi ba ona. Ida ne'e mak perigu liu,” dehan ne’e, ba Jornalista sira iha resintu INSP-TL, Komoro, Sesta (03/10).

Nia esplika, bainhira asu tata ema, iha periodu loron 28 nia laran, ema ne’e tenke hetan vasina dala lima, nune’e bele hamate virus raiva ne’ebé tama iha isin.

“Komu sira la disiplina, dala-ruma sona dala ida de'it no dala rua de'it, entaun ikus mai mosu sitomas, entaun tenke lakon vida. Ida ne'e mak problema," dehan nia.

Iha munisipiu Ermera, nia informa, forma ona ekipa taskc force hodi halo nafatin sosializasaun ba komunidade sira oinsa atu prevene raiva.

Tuir dadus, to’o iha inisiu Outubru ne’e komunidade ne’ebé asu tata hamutuk na’in 150 resin. Husi númeru ne’e na’in haat mak lakon ona vida, inklui na’in ida husi Bazartete.

Molok ne’e, Diretór Servisu Saude Munisipiu Likisa, Luis Manuel hatete, tuir informasaun ne’ebé nia simu husi parte familia katak, hafoin asu tata pasiente ne’e, IL fase no halo rasik tratamentu ba nia an.

“Bainhira asu tata, sira langsung fase rasik no halo tratamentu rasik, no la ba iha fasilidade saúde, sira langsung fila fali mai uma,” dehan Diretór ne’e via telefone, Kuarta (02/10).

Maske kanek ne’e konsege di’ak, maibé iha fulan Setembru nia laran, IL hahú hatudu sintomas raiva nian.

“Iha 26 Setembru ne'e ambulansia ba foti mai iha Sentru Saúde Internamentu Likisá halo tratamentu loron ida iha ne'e, depois haree ba sitomas ne'e aumenta entaun refere ba Hospoitál Nasionál Guido Valadares," nia dehan.

Bainhira hala’o tratamentu iha HNGV, tanba nia kondisaun grave liu tan, nune’e familia deside hodi lori ba uma, no iha Kuarta (01/10) kalan, IL nia iis kotu.

Ho kazu ne’e, total ema ne’ebé mate tan raiva bazeia ba dadus husi Organizasaun Mundial Saude, sa’e ona ba na’in 21.