Ministru Interior, Francisco da Costa Guterres hatete, nia haruka ona karta ba Komando hodi oriente membru CSP atu kontinua fó seguransa ba eis Prezidente Repúblika no eis Primeiru Ministru Taur Matan Ruak; eis Prezidente Repúblika, Francisco Guterres Lú Olo; eis Primeiru Ministru, Mari Alkatiri; no eis Prezidente Parlamentu Nasionál, Vicente Guterres.
“Ha’u hakerek ona karta ba Komando Jeral PNTL hodi mantein lai seguransa CSP sira hodi hein desizaun governu nian, tanba iha lei fó loron 30 ba governu atu prepara trazisaun sira ne’e,” dehan Ministru Francisco iha Kuartel Jeneral F-FDTL, Fatuhada, Sesta (03/10).
Razaun MI husu mantein seguransa ba eis titular sira, tanba sira mesak fundador nasaun, veteranus no luta-nain ba Timor-Leste ninia independensia.
"Ha'u atu dehan katak eis titular ema sira ne'e uluk ne'e mesak veteranus, ema ne'e uluk lidera funu ne'e, atu mate karik, mate ba rai ida ne'e no terus ba rai ida ne'e, ita mós tenke haree ida ne'e."
Nia dehan, atual PM Xanana no PR Horta nafatin hetan seguransa tanba dadauk ne’e sira nu'udar titular.
"Maibe sira na’in- haat ne'e importante. Imi hatene sira-nia papel iha rezitensia oinsa, tanba ne'e mak ita haree. Governu agora prepara hela ninia prosesu tranzisaun, depois dezisaun governu sai sei re-organiza halo fali despaixu ida hodi bele implementa buat ne'ebé mak governu foti," nia esplika.
Molok ne’e, Diretór Ezekutivu Hali ba Dame, Abel Amaral, husu ba governu atu tetu didi’ak molok retira Korpu Seguransa Pesoal ne’ebé durante ne’e fó seguransa ba eis titular sira.
Tuir Habada, maske legalmente la nesesariu ona atu koloka seguransa pesoal, maibé tanba eis titular maioria nu’udar lider rezistensia ne’ebé lidera funu to’o ukun an, nune’e presiza mós iha konsiderasaun balun.
“Tanbasá mak Habada fó fila fali estadu atu tetu? Mezmu legalmente ne'e bele dehan la nesesáriu ona, maibé hanesan sira Eis Titulár maiória líder rezisténsia ne'ebé lidera funu to'o ita ukun-an, to'o agora. Entaun husu ba estadu tenke tetu didi'ak bainhira atu dada pesoal seguransa sira ba Eis Titulár sira.”
“Ami husu ba Ministériu Interiór atu hahú hanoin ona nesesáriu ka la'e husik hela pesoal seguransa sira mantein seguransa ba ita-nia Eis Titulár sira," dehan Abel ba jornalista INDEPEDENTE, iha nia kna'ar fatin, Kuarta (01/10).
Nia afirma, maske lei ba ida ne’e la eziste ona, maibé estadu tenke rekoñese sira ninia kontribuisaun ne'ebé labele selu.
"Entantu buat barak ita bele hasai, maibé kona-ba seguransa pesoal karik la mantein ho númeru ne'ebé agora karik bele redus ka oinsá, maibé ita fó fila fali estadu, liu-liu Ministériu Interiór atu bele tetu".
"Ami hanoin Ministériu Interiór mós tenke kalkula rekursu ne'ebé daudaun ne'e ita-nia forsa seguransa sira iha, nune'e tenke iha balansu. La'ós dehan atu foti hotu ka husik nafatin, maibé tenke oinsá mak bele seguransa rai laran ne'e bele iha balansu,” dehan nia.
