Tuir Xefe Suku Home, Luis do Santos Maubano, hatete, fazeadamente prosesu ba uma tolu iha suku Home hela deit 20%, atu remata.

“Konstrusaun refere seidauk hotu, tanba distribuisaun material husi kompaña fornesedór sira atrazu, nune’e to’o agora konstrusaun seidauk remata,”dehan nia ba Online INDEPENDENTE, iha knar fatin, segunda foin horseik (27/06).

Ba uma tolu iha suku refere, nia dehan, konstrusaun hela deit ona atu reboka laran, tau odamatan, janela no mós monta plafon.

 Tanba ne’e, lori Suku Home no reprezenta povu sente orgullu ba inisiativa governu nian, ne’ebé benifisia programa ne'e direita ba komunidade vuneravel ka kbit la'ek sira.

Nia hatutan, implementasaun programa ne'e transparante tebes tanba durante halo verifikasaun dadus involve hotu orgaun independente sira nomós autoridade lokal.

Tanba ne’e, nia haktuir, maske progresu ne'e seidauk atinje 100%, maibé hanesan Xefe Suku louva, tanba programa ne'e bele kontribui ba rekoperasaun ekonomia komunidade sira nian.

Nia akresenta, durante ne'e autoridade lokal sempre iha liña kordenasaun diak ho tekniku PNDS, atu halo fiskalizasaun no kontrolu ba prosesu konstrusaun to’o finaliza.

Konstrusaun ne'e, hahu iha loron 09 fulan Agostu tinan 2021, no uma tolu ne'e ho medida hanesan 6×7, total orsamentu dolar amerikanu rihun $16 kada uma.

Iha fatin hanesan, benefisiaria Izelia da Costa, sente agradese tebes ba governu liu-liu implementador programa UKL liu-husi PNDS, tanba bele tulun hodi hakmaan sira nia sofrementu ne'ebé sira infrenta durante tinan naruk, hela iha uma ne'ebe la dignu.

 "Maske uma ne'e seidauk finaliza ho diak, maibé ha’u ho oan sira sente kontenti tanba bele hetan uma ne'ebé dignu husi ita nia na’in ulun sira. Durante tinan naruk nia laran, ha’u nia katuas oan husik ha’u ho oan nain tolu ba mundu seluk, no ha’u nia uma ho kondisaun ladiak, maibe ho maromak nia grasa ohin ami sente kmaan ona ho uma dignu ida ne'e,"dehan nian.

Tanba ne’e, nia promote, bainhira konstrusaun ne'e remata, nia sei kuidadu uma ne’e ho diak.