Ministru Prezidensia Konsellu Ministru (MPKM), Fidelis Manuel Leite Magalhaes hateten, projetu Dekretu Lei ne’e aprezenta husi Ministra Solidariedade Sosiál no Inkluzaun, Armanda Berta dos Santos, nune’e bele halo alterasaun datoluk ba Dekretu-Lei númeru 55/2020, loron 28 Outubru, ne’ebé aprova konstituisaun Fundu Rezerva Seguransa Sosiál no definisaun ba modelu jestaun.
Nia haktuir, ho alterasaun ida ne’e, define konseitu jestaun operasionál no permite katak, Fundu Rezerva Seguransa Sosiál, diretamente ka liu husi Banku Sentrál Timor-Leste ka entidade públika seluk, ne’ebé responsavel ba jestaun operasionál, bele uza kontratasaun ka sub-kontrasaun husi entidade sira seluk hodi asume funsaun espesífika balu ne’ebé inklui iha jestaun operasionál fundu nian.
" Imi lembra katak, iha 2020 Konsellu Ministru aprova ona fundu ida ne'e, maibe presiza halo alterasaun balun, nune'e fundu ne'e bele iha liu flexibilidade bele foti medids sira, para fundu ne'e bele jera retornu ne'ebé di'ak liu ba hirak ne'ebé kontribui ka hola parte iha fundu ne'e," dehan Fidelis Magalhaes hafoin reuniaun Konsellu Ministru iha Palasiu Governu, (17/05).
Aleinde ho alterasaun, klarifika katak ativu sira ne’ebé sei integra iha karteira Fundu Rezerva Seguransa Sosiál nian tenke emite husi entidade sira ne’ebé la aprezenta risku sub-tansiál inkumprimentu, atu garante seguransa ba fundu ne’e rasik, ho maksimizasaun rendimentu nian no minimizasaun risku nian.
