Iha enkontru ikus entre Xefe Governu ho Xefe Estadu ne’e, PM Taur informa kona-ba preparasaun ba transferensia poder no tomada posse PR eleitu no serimonia aniversariu 20 Maiu.
"Ne'e últimu enkontru ho Prezidente Repúblika Francisco Guterres Lú Olo, aproveita informa preparativu sira ne'ebé iha ba ita-nia seremónia aniversáriu 20 Maiu no transferensia poder sira, tomada de posse Prezidente Repúblika eleitu," dehan Taur hafoin enkontru ho PR Lú Olo iha Palasiu Prezidensiál Bairu Pite, Kuarta (18/05).
Kona-ba Xefe Governu hira mak sei mak partisipa iha seremónia posse no komemorasaun 20 Maiu, PM Taur hatete, Xefe Governu Guinea-Bisau, Xefe Estadu Portugál no Governadór Jerál Austrália mak sei partisipa.
"Ha'u hanoin aban tan ita bele hatene, kona-ba Xefe Governu Indonézia nian parese reprezentante ida mak mai," dehan nia.
Entretantu, hatan kona-ba ninia protidaun atu servisu hamutuk ho PR foun, Taur dehan, nia prontu pursentu 300 atu servisu hamutuk ho PR Horta.
"Prontu 300% servisu hamutuk ho Prezidente Repúblika eleitu José Manuel Ramos Horta," dehan Taur.
