Kazu Foun Covid-19 Na'in 22, Kazu Ativu Sa’e ba 257 Featured

By Saturnina da Costa Marsu 25, 2021 650
Dadus Covid-19 kada Cluster. Dadus Covid-19 kada Cluster.

DILI:Sala Situasaun Sentru Integradu Jestaun Krize (SIJK) relata ohin loron 25 fulan marsu detata tan kazu foun na’in 22, , nune’e kazu ativu sa’e ba 257.

Kordenador Forsa-Tarefa ba Prevensaun no Mitigasaun Surtu Covid-19 iha Timor-Leste Rui Maria de Arauju informa, husi kazu konfirmadu na’in 22, husi Dili na’in 21 no munisipiu Covalima na’in 1 no iha mane nain 17, feto na’in 5.

“Ema sintomátiku na’in 3 no ema asintomátiku ka la hatudu sintoma hamutuk na’in 19, nune’e hahú husi deteta kazu positivu to’o ohin loron 25 kazu ativu hamutuk 297,  na’in 283 mak la iha sintomas no na’in 12 mak iha sintomas lijeiru (hanesan ho flu/konsitpasaun baibain) no na’in 2 mak iha sintomas moderadu,” dehan nia liu husi telekonferensia iha CCD, (25/03)  

Nia esplika, iha Munisipiu Dili iha kazu foun 21, ho detalles hanesan tuir mai,

Kazu pozitivu 7, hela iha Aldeia, Suku sira ne’ebé afetadu iha Postu Administrativu Dom Aleixo. Positivu hirak ne’e halo teste PCR atu viajen ba estrangeiro.

Kazu pozitivu 2, hela iha Postu Administrativu Dom Aleixo ho Postu Administrativo Becora. Positivu hirak ne’e halo teste PCR atu viajen sai husi Dili.

Kazu pozitivu 9, hela iha Postu Administrativu Dom Aleixo no Postu Administrativu Cristo Rei. Positivu hirak ne’e kontaktu-besik ho kazu iha cluster sira ne’ebé eziste ona.

Kazu pozitivu 2, deteta iha vijilansia sentinel, 1 husi aldeia Mura, Suku Santa Cruz, Postu Administrativu Nain Feto, 1 husi Aldeia 30 de Agosto, Suku Comoro, Postu Administrativu Dom Aleixo.

Kazu positivu 1, hela iha Aldeia Taibessi Calma, Suku Lahane Oriental, Postu Administrativu Nain Feto. Kazu positivu ida ne’e, halo segundu teste, nu’udar kontaktu besik ho cluster ne’ebé eziste ona.

Ho nune’e, kazu detetadu ka positivu iha Munisipiu Dili husi loron 7 fulan marsu tinan 2021, to’o ohin loron 25 fulan  marsu tinan 2021, hamutuk hotu 238.

Ho baze ba informasaun ne’ebé ekipa konjunta saúde nian rekolle, foku/cluster kazu positivu iha Dili, hetan revizaun hanesan tuir mai, kazu detetadu 238 iha Dili fahe ba cluster 48, namkari iha instituisaun 4, eventu 1, fatin kuarentena 2, suku 16, iha Postu Administrativu D. Aleixo, Vera Cruz, Nain Feto no Cristo Rei.

Husi cluster 48 ne’e, iha cluster 16 mak semana 1 nia laran, la iha kazu foun.

Enkuantu husi horiseik mai ohin ema ne’ebé halo teste PCR iha  LNS hamutuk 538 no husi horiseik mai ohin, teste PCR ba ema ne’ebé atu hetan autorizasaun esepsionál sai husi serka sanitária Munisipiu Dili hamutuk 123.

Husi 11 de Marsu to’o ohin (semana rua nia laran) iha pedidu autorizasaun esepsionál atu sai husi no tama mai serka sanitaria iha Munisipiu Dili, hamutuk hotu 2,129.

Sekretariadu SIJK responde ona ba pedidu hamutuk 1,748 (82%). Husi total ida ne’e, 491 (28%) mak hetan autorizasaun.

Sira seluk ne’ebé la hetan autorizasaun tamba la prienxe kritériu ne’ebé define iha Resolusaun Governu, ou rezultadu teste PCR pozitivu.

Nune’e dadus jeral ba loron ohin, kazu foun na’in 22, kazu rekuperadu na’in 12 (nian 4 husi Fatumea, 1 husi Bebonuk, 3 husi BTN 2 Terra Santa, Madohi, 4 husi SEFOPE) no kazu ativu sa’e ba 257.

SIJK nafatin apela ba komunidade iha munisipiu sira hotu, wainhira hatene kona-ba ema ruma ne’ebé sai husi Dili, halo favor informa autoridade sira atu bele halo atendimentu ba sira.

Apela mós ba populasaun iha Munsipiu Dili no mós Munisipiu sira seluk: wainhira sente isin manas, kakorok moras, inus-ben, mear, favor hakat ba Sentru Saúde ne’ebé besik-liu atu bele hetan atendimentu.

Apela mós ba Timor-oan sira ne’ebé servisu iha loja Bravo Internacional iha Aldeia Formosa, Suku Gresenfor, Postu Administrativu Nain Feto, ne’ebé hetan kazu pozitivu nain 8 iha loron hirak liu-bá, atu aprezenta-an iha sentru saúde besik-liu ba imi nia hela fatin, hodi bele hetan atendimentu.

Rate this item
(0 votes)

Independente Digital TV