Bazeia ba alterasaun Lei Organizasaun Judisiariu, juiz ne’ebé elejivel atu asume kargu Prezidente Tribunal Rekursu (PTR) la’os de’it ona juiz klase dahuluk, maibé loke mós oportunidade ba juiz klase daruak.
Tuir lista Antiguidade dos Magistrados Judiciais Reportada ne’ebé publika iha Jornal Republika, Serie II, númeru 11, 15 Marsu 2024, total juiz ne’ebé elejivel atu hetan nomeiasaun ba kargu aas liu iha orgaun judisial iha na’in 10, kompostu husi juiz klase dahuluk na’in haat (4) no klase daruak na’in neen (6).
Ba klase dahuluk mak atual Prezidene Tribunál Rekursu, Deolindo dos Santos, ho nia durasaun servisu kategoria nian durante tinan 12, ho tempu servisu iha majistratura nian mak tinan 23.
Maria Natércia Gusmão Pereira ho durasaun servisu nian iha kategoria durante tinan 12, no durasaun servisu iha majistratura mak tinan 23.
Jacinta Coreia da Costa ho durasaun servisu nian iha kategoria durante tinan lima (5), no durasaun servisu iha majistratura tinan 23.
Duarte Tilman Soares ho durasaun servisu nian iha kategoria durante tinan 5, no durasaun servisu iha majistratura tinan 21.
Ba juiz klase daruak mak, António Fonceca Monteiro de Jesus ho nia durasaun servisu iha kategoria durante tinan haat (4), no durasaun servisu iha majistratura durante tinan 13.
Edite Palmira dos Reis ho nia durasaun servisu iha kategoria durante tinan 4, no durasaun servisu iha majistratura tinan 20.
João Ribeiro ho nia durasaun servisu nian iha kategoria durante tinan 4, no durasaun servisu iha majistratura tinan 20.
António Hélder Viana do Carmo ho durasaun servisu iha kategoria durante tinan 4, no durasaun servisu iha majistratura tinan 23.
Afonso Carmona ho durasaun servisu nian iha kategoria tinan 4, no durasaun servisu iha majistratura tinan 23.
Ivan José Suritay Patrocinio Antónino ho durasaun servisu iha kategoria durante tinan 2, no durasaun servisu iha majistratura tinan 9.
HAK husu PR labele deside mesak
Asosiasaun HAK husu ba Prezidente Repúblika, José Ramos Horta, atu labele deside mesak figura Prezidente Tribunal Rekursu (PTR), maibé presiza konsulta mós ho akadémiku ba direitu sira iha Timor-Leste.
"Prezidente Repúblika atu labele deside tuir ninia hanoin mesak. Ita iha akadémiku ba direitu ne'e lubuk boot, ita iha intelektual sira ne'ebé hatene oinsá mak atu fó konsellu nune'e bele deside," dehan Diretór Asosiasaun HAK, Feliciano da Costa Araújo, iha knaar fatin, Faról, horisehik.
Ida ne’e, tuir Feliciano, atu garante transparansia no akuntabilidade iha desizaun Tribunál.
“Ita lakohi lori intervensaun husi polítiku nian tama ba iha Tribunál... Ami fiar Prezidente Repúblika iha nia kapasidade atu deside ema ida ne'ebé serve atu ba kaer tribunál, nune'e labele mosu violasaun ba sidadaun nia direitu, transparansia, akuntabilidade katak desizaun ida ne'e klaru, justu ba ema hotu," katak nia.
Molok, iha Bulgaria Prezidente Repúblika, José Ramos Horta hatete, iha ona figura rua ne’ebé atu asume kargu nu’udar Prezidente Tribunal Rekursu (PTR) no Prokurador Jerál Repúblika (PJR).
“Ha’u iha ona figura rua ne’ebé atu subtitui PTR no PJR iha tempu badak ne’e," dehan PR Horta.
