Nia dehan, tinan ne’e Timor-Leste hetan Kardeál ida no ba dahuluk iha istória Timor nian no nomeasaun ba Arsebispu Arkedioseze Metropolitana Dili nian ba Kardeál sai notísia boot.
"To’o agora Timor-Leste seidauk iha Nunsiu Apostóliku no monseñór Marco Sprizi hanesan enkarregadu negósiu Vatikanu nian no hein tempu badak sei iha núnsiu ida hanesan Embaixadór Santa Sé nian," dehan PR Horta iha Sede Nunsiatura Apostólika, iha Motael, Tersa (20/9).
Nia hatete, relasaun entre Timor-Leste no Santa Sé di’ak dezde uluk kedan molok restaurasaun indepedénsia no prezensa Amu Papa João Paulo II nian halo Timor-Leste ho Santa Sé iha kedan relasaun amigável di’ak.
Entretantu, Vise Primeiru-Ministru Vatikanu, Arsebispu Edgar Peña Parra hateten, Papa Francisco iha esperansa, Sede Nunsiatura Apostólika foun ne’e servi povu no Uma Kreda Timor-Leste ho domin.
"Iha uma foun Papa nian ne’e, reprezentante pontífisiu bele servisu hodi dezempeña nia misaun iha Timor-Leste ho di’ak hamutuk ho Igreja lokál,” tenik nia.
Arsebispu Edgar hatutan, inaugurasaun ba Sede Nunsiatura Apostólika ne’e lori ema hotu-hotu ba hanoin hikas memória vizita Santu Padre João Paulo II nian mai TL iha tinan 1989.
