“Bazeia ba Banku Mundiál nia esperénsia ne’ebé hatudu ona iha mundu tomak, espera Banku Mundiál sei ajuda hodi transforma nasaun ida ne’e iha tinan 10 tuir mai, liu-liu husi dezenvolve ekonómia ida ne’ebé prosperu no modernu,” informa José Ramos Horta hafoin partisipa serimónia inagurasaun ba reabilitasaun edifísiu Banku Mundiál iha Lesidere, foin lalais.

Iha fatin hanesan, Country Diretora Banku Mundiál iha Indonézia ho Timor-Leste, Satu Kahkonen hateten, Banku Mundiál iha komitmentu hodi apoiu dezenvolvimentu ekonomia iha Timor-Leste.

“Ami iha komitmentu atu apoiu dezenvolvimentu ekonomia Timor-Leste ba tempu naruk,” haktuir nia.

Nia haktuir, iha nasaun barak Banku Mundiál la hela metin hanesan iha  Timor-Leste, tanba iha nasaun balun Banku Mundial ba halo de’it kooperasaun.

“Iha nasaun barak ami ba halo de’it kooperasaun, la’os hela metin, maibé ho inagurasaun edifísiu ne’e hatudu sinál katak, ami sei hela iha Timor-Leste ba tempu naruk,  tan ne’e mak ami iha komitmentu atu dezenvolve Timor-Leste,” hatete nia.

Nu’udar Country Diretora sente kontente ho prezensa Prezidente Repúblika, reprezentante Governu no parseiru sira iha serimonia inagurasaun ba reabilitasaun edifísiu Banku Mundiál.

“Iha biban ne’e ha’u hakarak kongratula Prezidente Repúblika foun, José Ramos Horta no hato’o ha’u nia parabans ba povu Timor-Leste ne’ebé foin lalais komemora loron aniversáriu restaurasaun indepedensia ba dala 20, espera katak ita sei servisu hamutuk iha tinan 10 ka 20 mai hodi lori Timor-Leste ba oin,” hakotu nia.