Diretór Administrasaun Finansas no Lojistika HNGV, Raul Humberto Gama hateten, overload iha Hospitál nasionál ne’e kontinua akontese tanba ezisténsia edifisiu ospitál hahú inisiu mai to’o agora infraestrutura ho nia kapasidade nafatin de’it, kiik liu no tuan liu ona.

“Ita kompara ho populasaun kada tinan kontinua aumenta, maibé ospitál nune’e nafatin, entaun, overload akontese iha ospitál,” nia hateten iha nia knaar fatin, Segunda (04/07).

Hakarak ka lakoi korridór sira hotu-hotu ospitál uza hodi bele rai kama atu bele halo tratamentu ba pasiente sira.

Ho ida ne’e daudaun ne’e Governu liu husi Ministériu Saúde (MS) iha planu ba master plan ospitál nian, maibé bainhira mak atu konkretiza parte ospitál la hatene, tanba  prosesu aprovijionamentu Ministériu Saúde mak halo.

Maibé planu Hospitál nian, kada tinan atu halo espansaun maibe atu halo konstrusaun foun ne’e labele tanba iha ona planu master, entaun osptiál sei halo espansaun ba sala Maternidade no sala operasaun.

Molok ne’e, Ministra Saúde, Odete Maria Freitas Belo hateten, master plan ospitál nian MS aprezenta ona atu inisia ho konstrusaun pediatria nian.

Prosesu ne’e iha ona komisaun nasionál aprovijoinamentu hodi prepara dokumentu loke tenderizasaun.