Xefe Departmentu Medisina Intensivu, Vidal de Jesus Lopez hateten, pasiente ne’ebé baixa iha fulan rua nia laran iha ICU hamutuk hotu 39, husi númeru ne’e pasiente ne’ebé baixa iha Abril hamutuk 27 no Maiu iha 23.

“Durante fulan rua ita rejista kazu mate hamutuk 18. Ne’ebé iha Abril ne’e pasiente 12 mak mate no iha Maiu pasiente na’in-neen. Sira ne’e hotu mate kauza husi Infesaun Respiratóriu Aguda. Pneumonia, trauma, tetanus inklui struk,” nia hateten iha knaar fatin, Segunda (04/07).

Totál médiku ne’ebé halo atendimentu hamutuk na’in-haat, enfermeiru tékniku aliadu hamutuk na’in-20.

Tuir rasio ne’e enfermeriu ida tenke haree pasiente ida, tanba pasiente sira ne’ebé tama ne’e kuidadus kritikus, se enferemeiru ida haree pasiente na’in 5-6 pasiente bele mate.

“Durante ne’e, tanba iha ICU kama neen, entaun kada loron enfermeiru na’in lima mak halo sift, signifika enferemeiru na’in ida mak haree pasiente na’in-rua ne’ebé konsidera ladun kritiku liu,” nia hato’o.

Kama iha ICU ne’e hamutuk neen  de’it, ida ne’e situasaun reál, ema hotu labele obriga, entaun bainhira iha sala ICU pasiente nakonu no iha internamentu balun atu pasa mai, ekipa deside trata nafatin iha sala normal tanba labele akomoda hotu iha ICU.

“Iha sala normal ne’e mos, Hospitál kria kurikulum fatin ida ne’ebé espesifiku ba kazu kritiku nian, tanba ita nia fatin maka nune’e ona, ita halo kontrola de’it,” nia hateten.

Daudaun ne’e estoke medikamentu iha ICU barak mak mamuk hodi distribui ba pasiente sira atu konsumu, maibé nia parte hamutuk ho ekipa kontinua buka alternativa hodi substitui aimoruk hirak ne’ebé laiha hodi fó ba pasiente.

Molok ne’e, Diretór Ezekutivu HNGV, Alito Soares hateten,  Hospitál Nasionál Guido Valadares hahú ukun aan kedan, ninia kama fixu mak hamutuk 283 de’it, hafoin iha momentu situasaun Covid-19, liu-liu iha Omicron nian, HNGV junta kama to’o 421.

“Maibé iha departamentu Interna Medisina Intensivista ninian, loos duni kama ne'ebé fixa iha neen de'it, maibé númeru pasiente ne'ebé persiza asesu ba ICU nian  kontinua aumenta,” nia hateten iha nia knaar fatin, Sesta (24/03).

Ho ida ne’e, alternativu ne'ebé Hospitál foti,  iha Hide Dependensia Unite (HDU), ne'ebé instala hotu iha departamentu rua hanesan, Departamentu Intera Medisina no Depertamentu Siruzia.

Entaun, kama hitu mak rai ba HDU, nune'e bainhira pasiente nakonu iha unidade ICU, pasiente seluk médiku sira transfere ba iha HDU rasik ho kondisaun maximu persiza prienxe atu bele halo tratamentu.