Vise Primeira Ministra no Ministra Solidariedade Sosiál no Inkluzaun (VPM-MSSI), Armanda Berta dos Santos hato'o asuntu ne'e ba Primeiru Ministru Taur Matan Ruak, nune'e konvida mós Xefe Governu hodi halo lansamentu ba programa ne'e iha Munisípiu Likisá.
“Ha'u relata mós kona-bá seguransa sosiál nian. Iha loron 07 fulan ne’e ita mós sei lansa osan idozu sira nian iha Munisípiu Likisá nune’e katuas-ferik sira hetan sira nia direitu. Uluk sira hetan $30 agora sa’e ona ba $50 no Primeiru-Ministru mak sei lansa," nia hateten hafoin hasoru-malu ho Xefe Governu iha Palásiu Governu, Sesta (01/07/2022).
Ministra mós halo atualizasaun serbisu durante assume hela Primeira Ministra interina no mós relatóriu anuál serbisu MSSI nian ba tinan 2021.
Molok ne'e Prezidente Institutu Nasional Seguransa no Sosial (INSS) Longuinhos Armando hateten, tinan ida ne'e INSS implementa pagamentu ba idozu sira iha fulan Juñu.
"Ne'ebe agora hahu ona selu pagamentu ba idozu ho osan $ 50 dolar, maibe ita presiza altera lai ba dekreitu lei ba ferik no katuas sira. Agora dadaun dekreitu lei ita lori ona ba Ministeriu Soliriedade Sosial Inklusaun (MSSI) no lori ba Konsellu Ministru (KM) , maibe Konsellu Ministru aprova ona ita hein implementa dteit ona iha fulan Juñu agora." Nia informa.
Orsamentu tinan ida ne'e ba ferik no katuas sira aprova kuaze montante millaun $35-resin, ba faze dahuluk ho orsamentu montante milaun $17-resin no mós ba faze daruak orsamentu millaun $17-resin, restu sei fó fila-fali ba Estadu.
Rejistu ba idozu hamutuk 100.000, maibé haree ba tinan 2021 kuaze 93.000-resin, inklui ema ho defisiénsia sira.
Iha tinan 2022, dadus ferik katuas ho ema ho defisiénsia aumenta tán ba 100.000, ema ho defisiénsia 9.000-resin.
