Embaixadór Xina iha Timor-Leste Xiao Jainguo hateten, doasaun ekipamentu médiku ne'e nesesáriu no urjente tebes ba Ministériu Saúde iha Timor-Leste.
"Pedidu doasaun husi MS ne'e iha tinan kotuk no Xina imediatamente hatan ba ida ne'e ho pozitivu, nune'e parte rua servisu makas hodi ultrapasa difikuldade transportasaun no finalmente to’o ona iha Timor-Leste liu husi tasi no aviaun," nia hateten iha SAMES Kampung Alor, Segunda (28/03).
Ekipamentu médiku hirak ne'e mak hanesan, Vasina Sinovac doze rihun-100, ventilador 20, oxijenio 20, reazente asidu nukleiku rihun-20, infus unidade 50, monitor pasiente unidade 50, mákina anaestetiku 2, mákina ultrasound unidade 2, dezinfektante botir rihun-50 no roupa protesaun rihun 10.
Ida ne'e hanesan pratika di'ak entre nasaun rua iha kooperasaun saude nian, asistensia ne'e mós hatudu Xina firme hodi kontinua apoia Timor-Leste iha luta hasoru epidemia.
Iha fatin hanesan, Vise Ministru Saude, Bonifácio Maukoli dos Reis sente haksolok tanba bele hetan ona apoiu ekipamentu médiku husi Governu Xina iha TL, atu bele responde lalais ba nesesidade ne'ebé persiza iha rai laran haree liu ba área saúde nian.
"Lori Governu TL nia naran, agradese ba Governu Xina ho nia komitmentu ne'ebé boot, bele ajuda Timor-Leste liu husi apoiu ekipamentu médiku haree liu ba área saúde nian," nia hateten.
Ministériu sei utiliza ekipamentu médiku hirak ne'e ho di'ak, hodi kontinua fo prestasaun saúde ne'ebé di'ak liu tan ba populasaun Timor-Leste tomak.
