Nia dehan, enkontru ho Xefe Estadu ne'e asuntu ida seluk mak preokupa loos ho situasaun joven sira iha Portugál. Triste loos, tanba ema sira organiza tiha alin sira ba Portugál hela de'it situasaun ida difisil.

"Ita daudaun ne'e akompaña hela situasaun iha Portugál hodi halo identifikasaun sé mak husik joven sira ne'e ba no bainhira ba sira iha kontratu ruma ka, la'o naran de'it ka oinsá?," dehan Xefe Governu, iha Palasiu Prezidensiál, Bairru-Pité, horisehik.

Nia hatete, atu governu bele haree saida mak bele ajuda no husu ba joven sira atu pasiensia uitoan, tanba nasaun sira ne'ebé Estadu no governu laiha akordu ne'e komplikadu liu. Mezmu iha nasaun sira ne'ebé iha akordu ne'e mós tenke tuir prosesu ida, satan laiha akrodu.

Nia esplika, Timor-Leste agora iha akrodu servisu hamutuk atu haruka traballadór mak Austrália no Korea du Súl, restu governu tenta hetan akordu atu asegura direitu, regalia no privilejiu ne'ebé sidadaun sira iha direitu.

Tanba, bainhira laiha akordu protesaun sei laiha, tanba governu ho governu laiha akordu no bainhira inisiativa sidadaun nian rasik ne'ebé deside an ba tuir lei nia rasik responsabiliza ninia an totalmente, tanba ne'e desizaun pessoal no ida ne'e mak problema ne'ebé oras ne'e daudaun joven sira infrenta Portugál.

Molok ne'e, Deputadu Bankda KHUNTO, Luis Roberto, husu ba governu atu kontrola ajensia internasional sira ne'ebé faan billeti iha Timor kona-ba viajen.

 “Governu tenki kontrolla di'ak, se lae joven sira ba terus iha ne'eba hamonu ita nia imajen, tanba sira ba toba iha ema nia varanda, ne'e imajen Timor Leste nia laiha tiha kedas, mazumenus governu liu husi Ministériu Negósiu Estranjeiru no Koperasaun (MNEK) koopera ho embaixada sira ne'ebé estabelese iha Europa, atu kria kondisaun ba joven sira, tanba sira ba antrian, sira hamlaha, hamrook halo TL nia imajen monu, ida ne'e governu tenki trata asuntu ne'e ho seriu,”  dehan nia.