Governu Renova Impozisaun Serka Sanitaria Iha Munisipiu 6 Featured

By Saturnina da Costa Abril 29, 2021 288
Reuniaun KM, kinta (29/4), iha sala Palacio Governu. Foto Gab. MPKM. Reuniaun KM, kinta (29/4), iha sala Palacio Governu. Foto Gab. MPKM.

DILI:Governu liu husi Konsellu Ministru (KM), renova impozisaun serka sanitaria iha munisipiu Dili, Baucau, Covalima, Ainaro, Ermera no Vikeke.

Implementasaun serka sanitária iha Munisipiu hirak ne’e, relasiona ho kazu Covid-19 ne’ebé hahú daet mós ba munisipiu sira, ho posivelmente tama ona trasmisaun komunitaria.

Ministru Prezidensia Konsellu Ministru, Fidelis Leite Magalhães hatete, impozisaun serka sanitária iha munisípiu Ainaru, Baucau, Dili, Ermera, Covalima no Vikeke, ba loron 14 tan hahu husi oras 00:00 loron 3 fulan-maio to’o oras 23:59 husi loron 16 fulan-maiu tinan 2021.

“Nune’e, bandu sirkulasaun ema nian entre munisípiu ne’e ho sirkunskrisaun administrativa sira-seluk, exetu iha kazu sira ho fundamentu forte tanba razaun seguransa públika, saúde públika, asisténsia umanitária, manutensaun husi sistema abastesimentu públiku, ka razaun seluk ne’ebé presiza atu hala’o ba interese públiku nian,”dehan nia iha konferensia impresa, Palasiu Governu (29/04).

Entretanto,molok ne’e governu implementa ona serka sanitaria ba bala-4 iha munisipiu Dili, Baucau no Vikeke sei termina iha loron 2 fulan-maio tinan 2021.

Entretantu númeru kazu Covid-19 kada loron aumenta. Tuir dadus jerál, kinta (29/4) kazu konfirmadu hamutuk na’in 1.123, ho maioria asintomatiku.

 

Jornalista: Saturnina da Costa

Editor: Jose Sarito Amaral

Rate this item
(0 votes)

Independente Digital TV