Prezidente Komisaun Organizadór, Rogeiro Castro da Cruz hateten, komisaun organizadór preparasaun 12 Outubru Saudozu Max Stahl ba deslutu ne'ebé halo tinan ida, iha (28/10). Aumezmu tempu iha loron 28 ida ne'ebé, hanesan mós loron saudozu Sebastião Gomes ne'ebé komisaun mai informa ba Xefe Estadu husu prezidente atu ba partisipa mós oráriu ne'ebé komisaun prepara.

Nia hateten, Xefe Estadu simu no sei koloka tempu mak Xefe Estadu rasik termina no nia entusizamu tebes no komisaun mós agradese katak sei fila-fali ba bainhira, depois sei halo planu ne'ebé di'ak liután, keta atividade balun foun ne'ebé dala ruma bele mosu tan fali loron hira tuir mai.

"Orsamentu ba selebrasaun kuaze ke purvolta 41 ida, maibé saida mak komisaun nia mehi la atinji, mais ami iha vontade tomak  bele fiar katak, buat hotu sei la'o ho susesu," dehan Rogerio, iha Palásiu Prezidensiál Bairru-Pité, horisehik.

Nia dehan, serimónia dezlutu saudozu Max Stahl nian sei iha atividade oioin ne'ebé preparadu ona husi komisaun organizadóra no  sei konvida hotu juventude sira no populasaun sira atu hola parte iha atividade iha 27 Outubru, ne'ebé hahú ho reflesaun.

"Atividade sira ne'ebé komisaun prepara mak iha (27/10), ita sei hahú reflesaun kalan, aumesmu tempu ita halo animasaun kulturál iha Igreja Motael ninia oin,  no iha 28 (red  Sexta), halo misa lokraik iha Igreja Motael,  ita  halo long Marc husi Motael ba Santa Cruz hodi inagura saudozu nia kampa (Rate)  ne'ebé mak governu konstrui ona,  ita karik ai funan hotu, sei fila fali mai iha CMSTAL saudozu ninia fatin, muzeun da rezisténsia,"dehan nia.

Entretantu, enkontru ho Prezidente Repúblika José Ramos Horta ne'e,  Xefe Estadu hatan ba konvite husi Prezidente Komisaun Organizadór nian no nia parte kontente, tanba iha komisaun ida ne'ebé preparadu, atu nune'e  bele selebra loron saudozu Max Stahl nia koremetan  ho di'ak.

Maske saudozu Max Stahl  ema ne'ebé mai  husi li'ur, maibé nia ema ida  fó nia vida tomak, sai tan sidadaun Timor-Leste, no kaben tan iha Timor-Leste, no nia vida tomak fila fali mai  Timor-Leste ida ne'e mak buat ida ne'e úniku tebes.

Nune'e Xefe Estadu sei partisipa serimónia dezlutu saudozu Max Stahl,  no Xefe Estadu sei  konta istória Saudozu Max Stahl nia, ne'eba iha momentu Saudozu Max Stahl to'o iha Timor hala'o nia kna'ar, no mós ba iha ailaran.

Nia haktuir, sei  bolu mós testamuña  saudozu ligasaun sira atu konta  saudozu ninia istória sira, atu ema hotu-hotu bele hatene.