Ines hato'o ba primeiru ministru katak, Governu Austrália halo mudansa ne’ebé sira bolu Pasific-Australia Level of Visibility. Mudansa ida mak Timor nia trabalador sira balun bele hetan vistu fulan sia no balu bele hetan visa to'o tinan haat.

Nu'udar xefe misaun reprezenta Estadu Timor-Leste, mai husu primeiru Ministru hataan ka lae ho posibilidade ne'e, maibe hetan reasaun pozitivu husi xefe governu.

"Primeiru Ministru hataan ho ideia ida ne'e, entaun ho ida ne'e mak ha'u mai hato'o ba primeiru ministru agora iha mós dalan ba timoroan sira imigra ba Austrália," dehan Ines, iha rezisténsia primeiru ministru, Farol, Tersa (20/9).

Nia dehan, tinan-tinan sei fó ema rihun tolu (3.000), depois sei tama iha lotaria hafoin hili ida ne'ebé hetan bele aplika ona prosesu ba vistu, entaun to'o iha ne’ebá bele hetan serbisu, mas empregadór sira mak hanesan sponsor para sira ba Austrália hela iha ne’ebá.

Númeru ne'e la'os ba timoroan de'it, maibé ne'e ba Timor, Vanuatu, Samoa, Tonga, Fízi, Papua Giné, Salomon ho Nauro.

Ninia kriteria mak Ingles tenke hatene moos no mós tenke iha abilidade, ne'e sira bolu iha ona skil para ba serbisu, bele uza enjiñeiru bele mós mékaniku, mas buat hirak ne'e hotu sei iha diskusaun.

"Durante ne'e timoroan ba serbisu iha Austrália hetan vistu durasaun fulan neen (6), mas agora muda ba fulan sia (9), tanba ami haree fulan neen la fó tempu para sira halo osan no rai osan hodi haruka mai Timor," dehan nia.

Times skill ne'e agora implementa hela ona, agora sira muda atu hadia di'ak liután, mas times skill ne'e implementa dezde Abríl 2021.

Bainhira sira hetan visa tinan haat hanesan iha mós dalan ba sira atu ba halo kursu atu hasae treinamentu hanesan sira bolu abilidade vokasional training iha area ne'ebé sira hili, maibé toos na'in ka empregadór mós tenke konkorda malu ho trabaladór sira

"Ida fali mak ha'u hato'o mós ba primeiru ministru, iha reforma ne'e ha'u husu mós ba Austrália atu haree mós ba setór mina-rai no gás, foin dadauk ne'e ita pasa mós mineiru," dehan nia.

Agora daudaun, iha kompañia ida naran Beacon Mining Kalgolier iha Pert, nia hahú ona ho timoroan na'in ualu (8) atu ba hetan treinamentu kona-ba área mina-rai nian. Husu mós ba timoroan sira atu ba hetan treinamentu oinsá atu tau-matan ba ferik no katuas sira iha Austrália, agora presiza trabaladór barak.

"Ita iha Timor-Leste ita la iha fasilidade atu haree ferik ho katuas, entaun sira tenke hetan treinamentu, ha'u fiar katak Austrália sei organiza ona ita nia ema sira ba hetan treinamentu iha Fízi, tanba Fízi mak iha fasilidade treinamentu ba ferik katuas sira para depois ba serbisu iha Austrália, importante mak ne'e ita nia ema sira tenke hatene ingles, nivel Ingles tenke aas oitoan," nia akresenta.

"Biar ba se labele ha'u husu ba Austrália atu fo nafatin dalan ba ita nia ema sira ba tomak haree ferik ho katuas biar ba la iha abilidade bele ba iha dapur tein, mais bainhira sira tein bele hetan treinamentu no ba eskola depois liu tinan haat sira bele hetan sertifikadu tree," nia dehan,

Enkuantu ida fali mak Austrália hakarak aumenta sira nia imigrasaun iha neeba, entaun sira loke dalan agora ba Timor oan no  mós ema sira rai Pasífiku, ne'e signifika saida Timor-oan ne'ebé ke iha abilidade no mós Timor hirak ne'ebé hatene ona ingles bele aplika ba sira bolu Pasífiku Eingesman visa.

Katak bele ba hela ona iha Austrália agora ida ne'e sei iha diskusaun hela, Austrália sei konsulta ho hotu-hotu empregadores sira konsulta ho governu, konsulta ho xefe misaun iha Austrália liu-liu Timor-Leste ho Pasífiku sira hanesan Vanuatu, Tonga no mós Samoa karik aseita ka lae Timor nia ema sira ba halo viza hela ona iha Austrália bele lori feen oan sira sira sei hetan direitu ba eskola serbisu no depois bele hela permanente iha ne'ebá.