Embaixador Japaun iha Timor-Leste,Kinefuchi Masami hatete Governu Japaun iha inisiativa hakarak ajuda Governu Timor-Leste hodi oferese kareta ambulansia hirak ne’e atu fasilita servisu saúde nian.
“Hare ba fasilidade transportasaun liu-liu iha Ministériu Saúde menus liu, entaun ami nia Governu deside atu ajuda kareta ambulansia hirak ne’e,” dehan nia iha serímonia intrega kareta ambulansia ba Minitériu Saúde, iha Palasiu das Cinza, Kaikoli, kuarta ohin (12/05).
Tanba ne’e, nia husu ba povu tomak atu hamutuk kombate propagasaun surtu Corona virus ne’ebé mundu hotu infrenta.
Embaixador ne’e informa, kareta ambulansia 38 ne’e sosa ho osan montante Miliaun $4.6.
Iha fatin hanesan Minístra Saúde (MS), Odete Maria Freitas Belo hatete, ho apoiu ne’ebé Governu Japaun oferese, ida ne’e hakman ona servisu Ministériu Saúde nian, bainhira halo atendementu ba ema moras no mós Covid-19.
Tuir nia, ambulansia ne’e bele tula moras sira ba Sentru Saúde ne’ebé besik hodi hetan asistensia ho lalais husi profesional saúde sira.
Entretantu, tuir planu kareta ambulansia hirak ne’e sei distribui ba munisipiu 12 inklui RAEOA no restu sei halo atendementu ba moras Covid-19 iha Dili.
Enkuantu, kareta ambulansia ida fó ba Sekrtáriu Estadu Protesaun Sivil (SEPS) atu halo atendementu ba vitima dezastre naturais.
Nune’e, Governu liu husi Ministériu Saúde hato’o agradesementu ba Governu Japaun tanba bele ajuda ona Timor-Leste.
Jornalista: Camilio de Sousa
Asistente Editor: Saturnina da Costa
