Projetu proposta lei ne'e aprezenta husi Primeiru-Ministru (PM), Taur Matan Ruak, ne'ebé ninia objetivu atu halo renovasaun ba medida exesionál no temporária sira atu halo vijilánsia sanitária hodi hataan ba pandemia Covid-19 nian, hodi aumenta vijénsia husi artigu da-3 husi Lei númeru 24/2021. Ho alterasaun ne'e, medida exesionál sira sei prolonga ba períodu ida ho durasaun loron 120.

"Depois ita halo kotu estadu emerjensia, ita husu autorizasaun ne'ebé fiksu husi Parlamentu Nasionál bainhira sei iha Covid-19, ita husu autorizasaun atu bele karik presiza governu bele iha kobertura legál ba medida exesionál temporaria hodi halo vizilansia sanitaria hodi hataan ba pandemia Covid-19," dehan Ministru Prezidensia Konsellu Ministru (MPKM), Fidelis Magalhaes, iha Palásiu Governu, Sesta (4/11).

Komu ida ne'e husu iha Novembru liu ba no nia renovavel kada loron 120, agora ninia periodu ida agora ne'e hotu sei la sala hotu iha 13 Novembru maka governu presiza tan aprova hodi husu ba Parlamentu Nasionál autorizasaun refere.

“Ida ne'e hanesan akopaña beibeik ona, ita husu kada 120 dias, karik iha futuru mai nesesidade ba iha intervensaun sira ba prevensaun mitigasaun sira Covid-19 nian la iha ona, ida ne'e ita la presiza husu tan ona ba iha Parlamentu,” dehan nia.

Purenkuantu, husu tan husi Parlamentu Nasionál para bele fó kbiit legál ba governu liuliu ministériu saúde bainhira presiza bele halo intervensaun sira hodi salva sidadaun sira-nia vida iha kontestu Covid-19.