Governu Australia Apoia Tenda 220 Mai TL Featured

By Camilio de Sousa Maiu 08, 2021 1005
WFP Apoia Tenda 220 Mai TL. Foto: Camilio/Independente. WFP Apoia Tenda 220 Mai TL. Foto: Camilio/Independente.

DILI:Governu Australia liu-husi Organizasaun World Food Programme (WFP), apoia tenda 220 mai Timor-Leste, ne'ebe tula ho aviaun MY JET EXPRESS husi Malazia, hodi oferese ba vitima inundasaun sira.

Diretor Jeral Protesaun Sivil Inspektur Polisia Ismail Babo hatete, ohin Aviaun MY JET EXPRESS husi Malaysia tula ona apoiu solidaridade husi Australia liu-husi World Food Programme (WFP) ba vitima inundasaun sira ne’ebé hetan uma estragus.

“Apoiu solidaridade asistensia úmanitaria ne’e sei distribui ba ita nia komunidade sira ne’ebé hetan uma estragus total, atu uza temporariu hodi hein material konstrusaun ne’ebé ajudu husi governu iha tempu badak,”dehan nia iha Aeroportu Intenasional Nikolau Lobato, sabado ohin (08/05).

Nia rekoñese katak, apoiu ne’e mós seidauk sufisiente ba vitima inundasaun sira, tanba tuir dadus ne’ebé SEPS rekolla hamutuk atus 5 resin iha teritoriu nasional Timor-Leste, enkuantu tende ne’ebé ohin to’o hamutuk 220.

Tanba ne’e, SEPS sei identifika dadus ne’e ho lolos ba vitima sira ne’ebé presiza liu.

Tuir planu,  iha segunda semana oin SEPS sei koopera ho tekniku sira iha WFP hodi fó treinamentu ba staff terenu SEPS nian, oinsa atu halo instalasaun ba tenda, molok  distribui ba komunidade afetadu sira.

Iha biban ne’e SEPS lori Governu nia naran hato’o obrigadu wain ba apoiu WFP, ne’ebé sempre prontu ajuda povu Timor-Leste iha tempu defisil.

 

Jornalista: Camilio de Sousa

Asisten Editor: Saturnina da Costa

Rate this item
(0 votes)
Last modified on Sábadu, 08 Maiu 2021 18:24

Independente Digital TV