Tanba ne’e, Konsellu Ministru konsidera proposta ne’e no sei propoin ba Prezidente Repúblika, Francisco Guterres Lú Olo, hodi halo renovasaun estadu emerjénsia ne’e, ba loron tolunulu tan.

“Haree ba mudansa preokupante husi situasaun epidemiolójika no proliferasaun ba kazu sira ne’ebé mak rejista ona husi kontájiu Covid-19 nian, tantu iha nivel rejionál, no mós iha nivel mundiál, no atu evita no neutraliza risku sira husi propagasaun SARS-CoV-2, atu nune’e bele proteje saúde públika no iha kbiit atu hatán ba Sistema Nasionál Saúde nian, Governu propoin ba Señór Prezidente Repúblika katak, ho renovasaun estadu emerjénsia nian ne’e, permite atu suspende ka limita direitu no garantia fundamentál balun,”dehan Ministru Fidelis, hafoin reuniaun Konsellu Ministru, kuarta ohin, iha sala Ministériu Finansa Dili.

Fidelis hatutan, hafoin Presidente dekreta renovasaun estadu emerjénsia ne’e, Governu kria fali medidas foun ba surtu Covid-19.

Molok ne’e, Diretór SIJK, Brigadeiru Jenerál João Miranda “Aluc” hatete, SIJK aprejenta proposta ba Konsellu Ministru hodi extenda tan Estadu Emerjénsia ba dala-12, tanba haree ba númeru kazu Covid-19 ne’ebé loron ba loron aumenta iha Munisipiu Dili no Munisipiu Baucau no Vikeke.

Entretantu, Estadu Emerjensia dala-11  sei remata iha loron 2 fulan abril tinan 2021.

Sala Situasaun Sentru Intergradu Jestaun Krize (SIJK) mós kuarta ohin relata katak deteta tan kazu foun na’in 21, nune’e kazu ativu ne’ebé baixa iha sala izolamentu Vera Crus no Tasi-tolu sa’e ba 247.

Husi kazu foun 21 ne’e, Dili aumenta 20 no Baucau na’in 1.

SIJK apela nafatin ba populasaun katak atu kontinua badinas uza mascara, fase liman beibeik ho sabaun ka dezinfetante ruma, evita kose liman ba matan, inus ho ibun, bainhira kumprimenta malu, lapresiza ka’er liman, bensa-liman, rei-malu ka haku’ak malu, evita halibur malu barak, no hamri’ik ka tur do’ok husi ema seluk, mínimu metru ida ho balun-ninin no rohan.

Jornalista: Saturnina da Costa

Editor: José Sarito Amaral