Desizaun ne’e bazeia ba proposta husi Sentru Intregadu Jestaun Krize (SIJK), ne’ebé husu atu hapara ona serka sanitária no konfinamentu obrigatóriu iha Postu Administravu Fatumea, tanba laiha ona kazu ba Covid-19.
Tuir Ministru Prezidensia Konsellu Ministru, Fidelis Leite Magalhãens hatete, haree ba evolusaun situasaun epidemiolójika iha postu administrativu ne’e livre ona husi surtu Covid-19 maka Konsellu Ministrus aprova ona projetu rezolusaun Governu ne’ebé revoga rezolusaun Governu nu. 13/2021, loron 10 fulan-marsu, ne’ebé impoin hapara serka sanitária iha Postu Administrativu Fatumea ne’e.
Molok ne’e kazu pozitivu Covid-19 iha Fatumea hahú deteta iha 24 Fevereiru 2021 iha aldeia Klauhalek, Suku Bee-Lulik Leten. Hafoin hakat tuir kontatu-besik, ikus mai ekipa vijilansia deteta transmisaun lokal iha Fatumea, durante implementa serka sanitaria ka lockdown ba Munisipiu Covalima hahú iha loron 26 Fevereiru.
Maibé ho evolusaun ne’ebé iha kazu konfirmadu hahú redus, tanba ne’e Governu deside hodi hapara serka sanitária iha Munisipiu Covalima iha loron 10 fulan-marsu no kontinua prolonga serka sanitária iha postu administrativu Fatumea to’o loron 21 fulan-marsu tinan ne’e.
Maibé rejultadu ikus kazu konfirmadu positivu na’in ida ne’ebé iha Fatumea hatudu negativu, ho nunee, kuarta horsehik (24/3) Governu deside hapara serka sanitária iha Fatumea.
Jornalista: Saturnina da Costa
Editor: José Sarito Amaral
