Enkuantu, formasaun ne’e hala’o durante semana ida nia laran, hahú iha loron 20 to’o 24 fulan-Novembru tinan ne’e.

Funsionariu hirak ne'e mai husi kargu diretór, xefe departamentu no kargo xefia sira seluk, ne'ebé mai husi munisipiu inkliu nasionál.

Sekretáriu Estadu Kooperativa, Arsenio Pereira da Silva, hatete, objetivu husi formasaun ne'e atu eleva tan kapasidade diretóres no kargo xefia sira ne'ebé dadaun ne'e hala'o knar iha Sekretáriadu Estadu Koperativas (SEKoop), iha teritorio laran tomak.

“SEKoop iha nia orgánika ida katak presiza iha lideransa, tan ne'e husu ba lideransa SEkoop nian atu sai lalenok ba funsionáriu sira seluk atu la'o tuir,”dehan nia iha CCT Railako, Segunda (20/11).

Nia hatutan, ba lideransa sira hotu, kada tinan iha obrigasaun atu tuir formasaun durante oras 40 nia laran, atu aumenta kapasidade no komitmentu servisu.

Governante ne’e mós, husu ba kargu xefia sira atu sai ezemplo ne’ebé diak ba nia funsionariu sira.

“Ita mak fó oportunidade ba ita nia funsionariu sira ne'ebé tutela mai ita, atu nune'e funsionariu sira labele manda sira nia aan,”tenik SEKoop.

Iha biban ne'e mós, Administradór Postu Administrativu Railaku Tomas da Costa Soares hato'o agradese ba Sekretáriadu Estadu Kooperativa ne’ebé realiza ona formasaun, nune’e liu husi formasaun ne’e bele motiva liu tan lideransa sira.

"Formasaun ne'e bele lori ba ita nia lideransa liliu iha Kooperativa hodi bele lori ba povu tomak hodi koñese diak liutan servisu kooperativa nian," dehan nia.

Entretantu, material ba formasaun ne’e mak hanesan, jestaun mudansa iha organizasaun, étiku komunikasaun no koordensaun servisu, motivasaun servisu, ekipa servisu ne'ebé efetivu no oinsa atu foti desizaun ne'ebé efetivus.