22 Novembru, Hahú Trata Passaporte Kada Loron Atende Na’in 140 Featured

By Ekipa Independente Novembru 21, 2023 5227
Passaporte Timor-Leste Passaporte Timor-Leste

DILI:Hahú aban, loron 22 fulan-Novembru tinan 2023, atendimentu passaporte sei la’o normal ho sistema foun, sei atende públiku ba trata pasaporte kada loron ema na’in 140.

Diretór Jerál Servisu Rejistu Notariadu (DJSRN)-Minsitériu Justisa (MJ), João Fernando Martins Borges, informa, atendimentu públiku ba trata pasaporte ne’e sei hahú ho abitante na’in 140 ne’ebé kompostu hosi adultu feto na’in 50, adultu mane na’in 50, labarik 15, idozu 15 no ema ho defisiénsia na’in 10.

“Iha loron 22 atendimentu sei hahú iha oras tuku 8:30 dader, atendimentu sei fahe 140 ba kada loron,”dehan Diretor Jeral ne’e ba jornalista sira iha nia knaar fatin, Segunda (20/11/2023).

Nia hatutan, númeru atendimentu ne’e la inklui pedidu ofisial sira husi instituisaun relevante.

Iha munisipiu sira sei fó kompeténsia ba Diretór Munisipial sira hodi jere atendimentu rasik bazeia ba pedidu.

Pasaporte ne’ebé oras ne’e iha hanaran pasaporte segunda jerasaun, tanba iha abrit kualidade de seguransa ne’ebé aprova ona no iha mudansa, nune’e laiha impedimentu bá sidadaun sira nia viazen, tanba teste ona iha pasaporte atus hitu molok ne’e no la’o di’ak tebes.

Diretór ne’e esplika, pasaporte sira ne’e ninia tipu bazeia bá nia pagamentu $100 bá tratamentu oras 24, $75 tratamentu loron tolu, $50 tratamentu loron sanulu.

Hahú kedan desde pasaporte laiha iha tinan kotuk, pedidu ne’ebé Servisu Rejistu Notariadu simu hamutuk 2.000, nune’e 700 mak halo ona atendimentu ho pasaporte teste, enkuantu 1.000-resin mak iha hela prossesu atendimentu nia laran.

Rate this item
(1 Vote)

Independente Digital TV