SEI Apoia Fundus Rihun $68 ba Asosiasaun Empoderamentu Feto Featured

By Ekipa INDEPENDENTE Novembru 21, 2023 963
SEI Apoia Fundus Rihun $68 ba Asosiasaun Empoderamentu Feto iha Munisipiu Sira. Foto:Media SEI. SEI Apoia Fundus Rihun $68 ba Asosiasaun Empoderamentu Feto iha Munisipiu Sira. Foto:Media SEI.

DILI: Sekretária Estadu Igualidade (SEI) tersa ne’e, selebra akordu ho Prezidente Asosiasaun Feto sira ne’ebé mai husi munisipiu sanulu, hodi apoia fundus hamutuk dolar amerikanu rihun $68 ba asosiasaun hirak ne’e hodi hala’o sira nia atividade.

Tuir Sekretária Estadu Igualdade, Elvina Sousa Carvalho, hatete, fundos ne'ebe mak aloka ba iha asosiasaun sira mai husi OJE 2023 nian.

Sekretária Estadu mós husu ba asosiasaun sira atu uza osan ne’e ho kuidadu no tuir regras, nune’e nune'e iha futuru bele hetan tan.

“Sekretariu Estadu igualidade nia intensaun oferese fundos ne'e hodi bele empodera feto sira iha vida ekonomia para atu bele iha independensia finasial,” dehan nia iha Salaun Maria Goreti, SEI, Kaikoli, (21/11).

Governante ne’e haktuir, SEI nia pontu fokal sira mós halo monitorizasaun ba implementasaun fundus refere.

“Se iha buat ruma mak la tuir regras, ne'e akordu mak sei regularize,”tenik SEI.

Iha fatin hanesan, Diretór Jeral SEI, Armando da Costa hatete, Fundus ne’ebé fó ba asosiasaun empoderamentu ekonomia feto sira iha munisipiu, ne’e hanesan fundus rotativu, tanba ne’e bainhira bainhira grupu sira ne’e uza to’o ona tinan ida, sei fó fali ba grupu sira seluk.

Diretór Jeral ne'e mós husu ba grupos benifisiariu sira, bainhira hetan problema la bele nonok deit tenke fó hatete atu nune'e be bele fó solusaun diak.

Entretantu, osan ne’ebé aloka ba kada asosiasaun feto iha munisipiu mak hanesan, assosisaun feto haburas Ainaru hamutuk $7.500, assosisaun feto hakbit Futuru Aileu $ 9.000.00, asosisaun feto kulu fatuk laran Baukau, $7:500, assosisaun feto ba futuru Kova-liman $12.000.

Nune’e mós, assosisaun sentro feto forti Dili $ 9.000.00, assosisaun feto kafé Ermera hamutuk $600.00, assosisaun feto modelu feto kreativu modernu Lautem $2.000.00 no Assosisaun feto hakbiit ekonomia familia Likisa iha $7.000.00.

Aleinde, assosisaun feto empoderamentu feto igualidade no inkulusaun Manufahi $4,000.00 no assosisaun feto ba futuru Vikeke, iha dolar amerikanu rihun $ 4.

Rate this item
(0 votes)

Independente Digital TV