Fulan Hitu, International School Hamenus Propinas 25%

By Adelaide dos Santos Outubru 21, 2021 683
Logo Ensinu Báziku ST.Jude Thaddeus international. Foto:Google. Logo Ensinu Báziku ST.Jude Thaddeus international. Foto:Google.

DILI: Durante fulan hitu Timor-Leste iha períudu implementasaun Estadu Emerjénsia no atividade hotu paradu inklui atividade eskolár, Pré-eskolár no Ensinu Báziku ST.Jude Thaddeus international hamenus propinas 25%.

“Ami nia propinas kada fulan estudante-sira selu $180. Maibé, ita haree ba situasaun Covid-19, durante ne’e atividade hotu-hotu paradu. Entaun, ami hamenus ba 25% no sira selu de’it 75%, tanba durante ne’e ami mós esforsu buka meius hodi fasilita ita nia estudante sira estuda iha uma liu husi online no offline,” Diretora eskola, Chona P.Binuya, hateten iha  Vila Verde, Kuarta (20/10).

Fulan hitu ne’e konta hahú husi Marsu to’o Setembru, no  iha tempu serka sanitaria eskola ne’e mantein servisu hodi fasilita estudante sira hodi apreende.

Totál estudante iha international school ba tinan ida-ne’e hamutuk 1.000-resin, ho professor hamutuk 60.

Iha fatin hanesan, Inan-aman estudante, Elizita Baptista, sente triste tebes tanba maski iha situasaun serka sanitária eskola hotu paradu, maibé sira kontinua selu propinas.

“Ami triste tebes tanba ami kontinua selu propinas. Se bele eskola hamenus propinas ne’e to’o 50%, tanba ami nia oan sira  la asesu tanba internet, no dala barak ami nia oan sira la bele aprrende buat ida tanba internet lenuk,” nia hateten.

Antes ne’e Ministru Edukasaun Juventude no Desportu (MEJD), Armindo Maia, informa ona katak, eskola privada sira bele fó toleránsia ba estudante-sira ne’ebé to’o agora seidauk selu propinas, nune’e sira bele tuir ezame tanba durante ne’e eskola hotu paradu.

Rate this item
(0 votes)

Independente Digital TV