Prezidente Komisaun Organizadora Tasa da Liga FFTL, Atuál Diretór Kompetisaun, João Kampus hatete, FFTL hahú halo transferénsia prémiu jogu ba feze grupu nian no provizóriu klubu Portu Taibesi hetan prémiu jogu ho montante osan rihun $18.
“Ita hetene katak iha regulamentu kada jogu iha prémiu do jogu hamutuk rihun $10, ne'ebé oferese husi patrosinadór eskluziva, no main sponsor mak ETO group, ne'ebé ho kada jogu rihun $10 mak ita fahe ba parte tolu. Primeiru manan hetan 65 porsentu, impata hetan 60 porsentu no ida ne'ebe lakon hetan 35 porsentu,” Katak nia ba jornalista INDEPEDENTE, iha kna'ar fatin FFTL, Bairro dos Grilhos, Segunda (16/02).
Tan ne'e, Patrosinadór Eto grup gasta ona orsamentu kuaze rihun $159 ba faze grupu hamutuk jogu 15.
“Klubu ne'ebé hetan pagamentu as iha faze grupu mak, Portu Taibesi, ne'ebé ho rezultadu manan dala-rua no impata dala ida, ho orsamentu porvolta rihun $18,” Nia esplika.
Aliende ne'e, tuir fali ho ekipa sira seluk, ne'ebé hetan mós transferénsia ba pagamentu prémiu jogu.
Iha sorin seluk, Manajer Portu Taibesi, Carles Guterres, komfirma ho osan ne'ebé Portu Taibesi hetan atu garante klubu nia sustentabilidade. Hodi prepara ba Liga Futeból Timor-Leste.
“Klubu hakarak ejiste ba tempu naruk, tenke garante sustentabilidade. Entaun ita lori osan ne'e atu garante klubu nia sustentabilidade, no halo preparasaun di'ak atu hasoru liga ne'ebe tuir planu sei akontese iha tempu badak,” Dehan nia.
Menejer klubu ne'e konsidera, prémiu jogu ne’e, hanesan previléziu ba klubu hot-hotu. Tanba ba dahuluk Tasa da Liga FFTL oferese prémiu jogu ho montante boot.
“Ha'u nia haree ida-ne'e foin ba dahuluk. Ita haree katak realiza Tasa da Liga FFTL ho prémiu jogu boot. Ba klubu sente hanesan previleziu ida ne'ebé mak FFTL halo ba klubu sira,” Nia espresa.
Nune'e, nia iha esperansa katak, prémiu ne’e bele sai hanesan referensia ida ba órgaun Liga Futeból Timor-Leste atu bele banati tuir.
Entretantu, klubu ne'ebé partisipa iha Tasa da Liga FFTL, hamutuk 13, ne'ebe kompostu husi klubu primeiru divizaun 8 mak hanesan, AD-SLB Laulara, Karketu Dili Fc, Emanuel Fc, Portu Taibesi, Assalam Fc, DIT Fc, Coração Fc, no As Marca no klubu segunda divizaun hanesan, Aitana Fc, Santa Krus Fc, Lica-Lica Lemorai, Nagardjo Fc no Fitun Estudante.
Editor: Aquino Gomes
