Governadór BCTL hato'o kestaun ne'e, iha ámbitu inagurasaun edifísiu foun Kaebauk Investimentu no Finansas (KIF) SA, iha Postu Administrativu Maliana Villa,  Munisípiu Bobonaro.

“Hodi naran Konsellu Administrasaun no BCTL tomak, nu’udar instituisaun reguladór ba instituisaun finanseira iha Timor-Leste, apresia nia kontribuisaun iha dezenvolvimentu ekonómiku nasaun ni’an, liu-liu hanesan intermediáriu finanseiru ba negósiu mikro ki’ik no médiu. Tuir dadus BCTL ni’an, Kaebauk iha totál ativus liu US$60 miliaun, fó kreditu liu US$45 miliaun no serve kliente liu ema 22.000 iha Timor-Leste tomak,” Afirma Governadór BCTL, Hélder Lopes, liu husi komunikadu ne'ebé Média INDEPENDENTE, asesu husi Média-BCTL, Tersa (17/02).

Iha oportunidade ne'e mós, Governadór BCTL informa katak BCTL  aprova ona lisensa temporária ba Kaebauk atu sai banku iha rai-laran.

“Lisensa ne’e seidauk definitivu, no durante períodu tinan ida, Kaebauk presiza kumpre rekezitu sira ne’ebé determina ona atu bele hetan lisensa definitivu. BCTL husu Kaebauk atu alinia nia estratéjia ho orientasaun estratéjika BCTL nian, ne’ebé foka ba, (1) espansaun merkadu kreditu, liu-liu iha área rurál, (2) digitalizasaun servisu finanseiru, inklui Mobile Banking no Internet Banking, no (3) promosaun inkluzaun finanseira liu husi prezensa físiku no digital," Nia informa.

Purtantu, iha sermónia ne’e mós hetan partisipa husi entidade sira hanesan Ministériu  Komérsiu  no Indústria (MCI), Prezidente Autoridade Munisípiu Bobonaro, Banku kemersiál sira iha Timor-Leste, World Bank, International Finance Corporation (IFC), IBM, CCI-TL, ODTI, Moris Rasik, Federal Insurance, Sinar Mas, Telkomcel, Telemor, Timor Telecom, Tuba Rai Metin, Polísia Nasionál  Timor-Leste (PNTL) no FALINTIL-Forsas Defeza  Timor-Leste (F-FDTL).

Editor: Aquino Gomes