Minutu primeiru jogu hahú iha kampu kuadru estadiu munisípal Dili. Ekipa Karketu ne'ebé mai ho kombinasaun jogadór Diaspora no jogadór Selesaun nasionál, lansa kedan atake ne'ebé másimu hasoru Assalam. Maibé Assalam  nia defeza kontinua rejiste hodi satan netik Karketu atu labele produs golu.

Elementus Adu Marques Namiruru, nunka rejiste no hanoin atu rende, maske Karketu fó presaun maka'as. Maibé sira halo jogu ho kalma liu husi kontra atake hodi fó presaun baliza Karketu Dili ni’an.

Sutu barak avansadu Karketu lansa, maibé seidauk kona iha alvu no sutu barak mós sei salva husi guarda rede Assalam. Maibé sorte monu ba Assalam iha minutu 30, Jogadór Augusto da Costa, lansa ona golu primeiru hodi muda skore ba 1-0.

Ho golu ne'e, halo estádiu munisípal Dili barullu liu tán, tanba adeptu sira-ne'ebé hamrik no tuur iha tribuna leten, haklalak liu tán hodi fó suporta másimu ba ida-idak nia ekipa. Nune'e fó suporta ba Jogadór sira-ne'ebé lori  bola fintas malu ba mai iha kampu laran.

Maske, ekipa rua halo jogu ho velosidade maka'as, Karketu hatudu jogu ne'ebé brillante ho forsa ne'ebé maka'as, ho meius oi-oin atu responde golu. Nune'e to'o arbitru deside termina jogu primeira parte, Assalam mak lidera provizóriu jogu ho 1-0.

Bainhira arbitru inisiu minutu segundu parte, Ekipa ne'ebe lideradu husi Treinadór estranjeiru Bernard Teye, halo kedan mudansa ba tátika no hasa’e liu tán intensidade jogu, no fó presaun maka'as ba Assalam Fc.

Ekipa Karketu halo jogu sai manas liu tán, no Jogadór sira kontinua luta ho objetivu tenke produs golu hodi halo impata ou manan jogu.

Luta ne'e sai duni realidade ba Karketu Fc, ne'ebé halo esforsu oi-oin, ikus iha minutu 83,   Karketu Dili liu husi nia Jogadór Daniel Gaio, konsege responde jogu ida hodi halo impata jogu ba 1-1.

Ho golu ne'e, konsege salva Karketu Dili husi  derota, tanba kontra atake ekipa rua ni’an to'o jogu termina laiha tan golu ruma. Nune'e ekipa rua termina ho impata 1-1.

Entretantu, tuir orariu jogu meia final Tasa da Liga Futeból Timor-Leste, volta daruak entre ekipa rua, sei kontinua fila ba iha loron-22 fulan ne'e, hodi deside ekipa ne'ebe mak atu hakat ba final.

Treinadór Assalam Fc, Adu Marques Nami Ruru informa, ekipa ne'ebé nia lidera konsege fó supreza ba Karketu iha jogu primeira parte.

“Hanesan ha'u ko'alia ona, ha'u sei halo supreza ida ne'e realidade duni. Tanba ha'u hatene ba Jogadór sira primeiru parte tenke joga di'ak, tanba hasoru Karketu. Nune'e ami komsege produs golu ida,” Katak nia ba jornalista sira, iha estádiu munisipal Dili, Domingu (15/02).

Maibé, nia dehan, nia parte la satisfas ho arbitru, tanba golu ne'ebe Karketu produs jogadór iha pozisaun offside.

“Nu'udar Treinadór, ha'u la satisfas mak bola offside no kona liman. Maibé tanba saida mak juis da liña  la foti desizaun,” Nia kesiona kestiona.

Portantu, Treinadór Karketu Díli Fc, Barnard Taye, rekoñese katak jogu entre ekipa rua ho intensidade aas, nune'e Karketu laiha oportunidade di'ak iha primeiru parte.

“Jogu ida ohin ho intensidade ne'ebe as, Assalam Fc mai ho preparasaun ne'ebe di'ak. Tanba ne'e ami nia jogu ladun di'ak, maibé ami kria oportunidade barak,” Katak nia.

Tuir nia, futeból mak hanesan ne'e, tanba antes ne’e promete atu marka golu tolu. Maibe sorte laiha.

“Ita haree, ami halo ameasa barak, maibé sei kona de'it nia alvu. Aleinde ami iha oportunidade barak no depois jogadór sira konsege hatama de'it ho golu ida,” Tenik Bernard.

Bernard agora, sei halo preparasaun masimu ba ekipa ne'ebe nia lidera, atu bele manan iha jogu volta daruak, atu bele ultrapasa ba finál tasa da Liga FFTL.

Editor: Aquino Gomes