Espozisaun Tais Loke iha Oecusse, Apoiu husi Estadus Unidus Amérika Featured

By Abril 25, 2023 729
Espozisaun Tais Loke iha Oecusse, ne'ebé hetan apoia husi Estadus Unidus Amérika. Foto:Media EUA. Espozisaun Tais Loke iha Oecusse, ne'ebé hetan apoia husi Estadus Unidus Amérika. Foto:Media EUA.

OEKUSSE: Enkarregadu Negósiu Estadus Unidus Amérika Tom Daley hamutuk ho Prezidente Rejiaun Administrativa Espesiál Oecusse Arsenio Bano no Diretora Ezekutiva Timor Aid Maria do Ceu Lopes lansa ona Espozisaun Tais ne’ebé finansia husi Estadus Unidus Amérika hodi hatudu atinjimentu sira husi joven Soru-nain Tais hamutuk nain 20.

Ho apoiu finanseiru husi Embaixador Estadus Unidus nia Fundu ba Prezervasaun Kulturál, Timor Aid patrosina ona estudante sira ne’ebé hala’o sira-nia estudu durante fulan 10 iha atividade Soru Tais ho instrutór mestre Soru Tais sira hodi promove liután prezervasaun Tais, ne’ebé UNESCO foin dadaun deside tiha ona hanesan patrimóniu kulturál Imateriál ne’ebé presiza salvaguarda ho urjente.

Joven nain 20 ne’e hetan ona formasaun hetan koñesimentu espesializadu no abilidade hodi soru Tais no dezenvolve komprensaun kona-ba importánsia husi sira-nia kontribuisaun ba patrimóniu Tais no kompromisu atu proteje sira-nia beiala nia patrimóniu.

 “Epozisaun ne’e marka konkluzaun husi programa formasaun ne’ebé di’ak tebes,” haktuir Enkarregadu Negósiu Estadus Unidus Amérika Tom Daley, iha komunikadu ne’ebé Online INDEPENDENTE sita, segunda (24/04).

"Salvaguarda Tais ne’e importante tebes hodi promove turizmu sustentável iha Timor-Leste. Projetu ida-ne’e reflete kompromisu Estadus Unidus Amérika nian hodi fó apoiu ba Soru-nain Timoroan sira no ba ema hotu ne’ebé serbisu hela hodi salvaguarda patrimóniu kulturál imateriál ne’e enkuantu ita serbisu hamutuk hodi haforsa kreximentu sustentável iha empregu, promove no hasa’e igualdade jéneru, no hadi’a ema-nia kondisaun moris."

Entretantu, iha fulan Setembru 2021, Embaixada Estadus Unidus Amérika fornese ona fundu ba Timor Aid ho montante $171,000-resin liuhusi Embaixadór nia Fundu ba Prezervasaun Kulturál hodi promove prezervasaun Tais Timor nian.

Enkuantu, projetu ne’e fornese formasaun ba Soru-nain Tais foinsa’e sira iha Oecusse no Covalima no apoia Soru-nain sira hodi habelar prosperidade ekonómika no hametin setór turizmu kulturál emerjente iha Timor-Leste.

Ho nune’e, liuhusi Embaixadór nia Fundu ba Prezervasaun Kulturál, Estadus Unidus Amérika mós patrosina kriasaun baze-dadus dijitál ba dahuluk hodi halo dokumentasaun ba tempu naruk kona-ba Tais oioin ne’ebé furak tebes ba ema sira iha Timor-Leste no mundu tomak.

Rate this item
(1 Vote)
Saturnina da Costa

Jornalista Jornal Independente

https://independente.tl

Independente Digital TV

Tuir ami iha Twitter

Kalendariu Notisia

« May 2024 »
Mon Tue Wed Thu Fri Sat Sun
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31