“Ha’u foin simu delegasaun altu nível ida husi emprezáriu sira Tailándia. Sira mai atu haree oportunidade oinsá bele investe hodi ajuda dezenvolve ita-nia rain. Ami troka hanoin di’ak tebes,” dehan PM Xanana liu husi Komunikadu ne'ebé Online INDEPENDENTE asesu iha Pájina Ofisiál Primeiru-Ministru Kay Rala Xanana Gusmão, Sesta (30/05).

Emprezáriu hirak ne’e iha ona persesaun di'ak-liu kona-bá realidade Timor, nune’e sira sei mai beibeik hodi haree oinsá bele hahú investimentu atu ajuda dezenvolvimentu TL.

Xefe delegasaun Tailándia, Ashwani Bajaj haksolik tebese no agradese tanba bele hasoru-malu ho Primeiru-Ministru, Kay Rala Xanana Gusmão.

“Ami foin mai Timor bá dala-uluk. Ami haksolok tebes atu bele aprende liu-tán, absorve no haree oportunidade saida de’it mak iha hodi ita servisu hamutuk. Ami hakarak fahe koñesimentu iha área turizmu, infraestrutura, kafé, plantasaun, ai-fuan no seluk tán ne’ebé bele dezenvolve liu-tán,” Ashwani Bajaj hateten.

Ashwani Bajaj mós felisita TL ne’ebé servisu maka’as hodi ikus mai bele integra hanesan membru plenu bá Association of Southeast Asian Nations (ASEAN).