“Husu de’it ba ita hotu reza ba Padre Abito ne’ebé mate horiseik (22/08) dehan asidente ho motór iha Dare no ita hein mós prosesu investigasaun husi ita nia polisia sira, tanba ita seidauk hatene soke ka ou monu tamba saida? ita hotu sei buka tuir hela ninia prosesu investigasaun,” dehan nia, hafoin hala’o viazen to’o Aeroportu Internasionál Leonardo da Vince, Italia, tersa horseik (23/08).

Don Virgilio hatutan, Uma Kreda Katolika no familia sente lakon bo’ot tebes ba Nai Jesus Kristu nia bibi atan di’ak hanesan Padre Abito nu’udar joven foin sa’e ida.

Tanba ne’e, Amu Bispu husu ba sarani tomak atu hasa’e orasaun ba Na’i Maromak hodi haraik fatin deskansa dame  ba Padre Abito.

“Padre Abito nia foin sai padre tinan tolu liu bá, ita triste tebes ho nia mate,” dehan Bispu.

Bispo Virgilio akresenta, maski nia la konsege partisipa iha serimónia misa  funebre ba Padre Abito nian, maibé nia parte husu ona ba Nai Lulik sira iha Dili no sarani sira hodi organiza misa to’o prosesu haloot matebian nia isin mate iha fatin deskansa ikus ne’ebé prepara ona.

Entretantu, Padre Abito hakotu iss iha Iha 22 Agostu, tuku 08.30 kalan, bainhira hala’o viazen ba Dare.

Nune’e, fila husi Dare hetan asidente iha dalan, no  rezulta Padre Abito lakon vida.

Tuir informasaun, iha Segunda kalan, Padre Abito José Carmeno Brites, haruka mensajen ba feto ida ho inisial MSR, atu ba haan ho nia iha restaurante ida iha Dare.

MSR aseita ho konvite husi Padre Abito no sira na’in rua uza motor marka Jupiter ho xapa matrikula E.8081, aranka Dare. Padre Abito mak kondus motor ne’e.

Maibé iha dalan klaran tanba rai nakukun ona, Padre Abito ho MSR deside hodi fila mai Dili.

“Sira na’in rua fila fali mai to’o iha dalan foun husi Dare nia tuun mai liu husi Mahoka nia uma leten ne’e mak halai sees, entaun soke penahan no sira monu ba baleta kuak. Sira na’in rua uza kapasete dala-ruma kapasete la metin, entaun kapasete semo sai, baku ulun ba troatoar balun iha ne’eba, entaun iha ne’e mak pandaka maka’as,” informa Xefe Seksaun Polisia Tranzitu Munisipiu Dili, Inspetor Domingos Sarmento Gama, iha Komando PNTL Dili, Kaikoli, tersa (23/08).

Iha asidente ne’e, nia dehan, Padre Abito sofre kanek grave iha ulun, enkuantu MSR sofre kanek kaman.

Hafoin asidente ne’e, nia hatete, konsege evakua Padre ho MSR ba Hospital Nasionál Guido Valadares, maibé Doutor sira la konsege salva padre nia vida.