Desizaun ne’e bazeia ba enkontru iha loron 22 fulan-abril tinan 2021, ne’ebé organiza husi Arke Dioseze Metropolitana Díli hamutuk ho Pároko no Vigário Parokial sira husi Vigararia Díli no representante husi Ministério Saúde liu husi Sala Situasaun Sentro Integrado de Jestaun Krize (SIJK) kona-ba medidas prevensaun moras Sars-Cov-2 no Covid-19 iha Munisípiu Díli,
Bazea mós ba suspensaun konfinamento obrigatório ne’ebé Governu deklara liu husi Prezidensia Konselho Ministru iha loron 8 fulan-abril tinan 2021 no kontinua aplika de’it serka sanitária iha Munisipiu Dili, Baukau no Vikeke.
“Ho ida ne'e, ha'u deside atu reativa fali misa ba públiko no selebrasaun sakramental sira, hahú iha Domingo aban (25/04), husu ba sarani sira atu kumpre nafatin medida preventiva sira hanesan, uza máskara, fase liman ho sabaun/hand sanitizer no tuir distansiamento sosial. Husu Pároko sira atu multiplika misa Dominikal hodi evita halibur ema barak,”dehan Arke Bispo Dioseze Dili, liu husi komunikadu ne’ebé Online Independente asesu, sabado ohin (24/04).
Arke Bispu husu mós ba Pároko sira atu limita partisipasaun povo sarani nian iha selebrasaun sakramento sira liu-liu iha batismo no kazamento.
Komunikadu ida ne'e bele suspende kualker momento bainhira situasaun Sars-Cov-2 no Covid-19.
Molok ne’e, Dioseze Baucau reativa uluk ona misa liturjia domingu (18/4), iha Igreja Katedral Santo António no Pároko Santuario Maria Auxiliadora Fatumaca.
Hafoin desizaun Dioseze Dili, Pároko São Jose Aimutin anunsia katak sei hala’o misa multiplika tuir desizaun Dioseze Dili nian.
Tuir Padre Pároko São Jose Aimutin, Emanuel Lelo Talok, CMF, hatete katak orariu misa diaria sei hala’o iha dader horas tuku 6:15 no lorokraik tuku 6:00.
Enkuantu misa dominical ba loron sabádu sei hala’o iha lorokraik, tuku 4:30, no tuku 6:00.
Loron domingu, sei hala’o misa iha horas tuku 7:00, tuku 9:00, tuku 11:00, orariu lorokraik nian iha tuku 4:00 no tuku 6:00.
Amu Emanuel klarifika katak, desizaun Dioseze Dili ne’e atu reativa de’it Santa Misa, enuantu ba selebrasaun sakramentu sira seluk sei hein orientasaun tuir mai.
Entretantu, ba extensaun kapela, se ema barak, bele hawa'in mos missa, depende mos ba Padre sira ne’ebé preparadu.
Jornalista:Saturnina da Costa
Editor:Jose Sarito Amaral
