Prezidente Bankada CNRT, Duarte Nunes hateten, sira hala'o nafatin servisu iha terrenu no hala'o ona konsolidasaun iha nivél munisípiu.

"Agora ami sei halo nafatin iha nivél rejiaun prontu atu kompete iha eleisaun parlamentár," dehan nia, iha Parlamentu Nasionál, horisheik. 

Nia hateten, tuir dekretu lei uluk Prezidente Repúblika sesante, Francisco Guterres Lú Olo, halo ba eleisaun antisipada ne'e iha 19 Fevereiru 2018.

"Signifika ké tanba mandatu lejizlativa ida ne'e tinan lima, entaun uluk ita halo eleisaun iha 2018 iha fulan-Maiu. Ha'u hanoin iha tempu ida-ne'e bele iha desizaun ruma, atu ita ba eleisaun, labele naruk liu no labele badak liu," dehan Duarte.

Nia hatutan, maibé buat hotu iha Prezidente Repúblika nia liman bainhira mak dekretu loron Eleisaun Parlamentár ni'an.

"Kuandu Prezidente Repúblika dekreta ona, ita prontu hala'o. Depende Prezidente Repúblika," dehan nia.

Konferénsia Nasionál ka Kongressu nasionál partidu CNRT, nia hateten, iha Lei partidu polítiku dehan desizaun tenke liu husi Konferénsia ka Kongressu mak foin priense ba partisipa iha eleisaun.

"Agora foin daudauk antes halo eleisaun prezidensiál partidu hola ona desizaun atu la estende estrutura to'o tinan-lima, maibé ho desizaun ida-ne'e atu prepara ba eleisaun tuir mai ne'e," Nia haktuir.

Nia fundamenta, entaun depois eleisaun mak halo konferénsia nasionál ka kongresu nasionál laiha problema.

"Importante mak tenke iha desizaun ruma atu prepara aan atu tuir eleisaun parlamentár, tanba halo tiha ona konferénsia (iha Eleisaun Prezidensiál) ita espera katak ita bele lori rezultadu ne'e ba eleisaun," tenik nia.