Koordenadór CGT-TL, Sabino Fitun hateten, presiza orsamentu ba sidadaun difisiente sira iha rai laran hodi bele ajuda no hakbi’it maluk difisiente sira seluk, tanba durante ne’e governu ladun seriu tau atensaun liuhusi Orsamentu Jerál Estadu (OJE kada tinan.

Nia dehan, ekípa CGT-TL mai hasoru Prezidente Repúblika hodi hato’o preokupasaun ne’ebé asosiasaun ne’e iha, tanba tinan hirak ba kotuk orsamentu estadu sempre la inkluzivu.

“Ami husu Prezidente Repúblika karik bele loke espasu díalogu ho órgaun estadu para ba oin kria Orsamentu Jerál Estadu ne’ebe tenke asesivel no inkluzivu ba Ema ho Defisiensia,” dehan Sabino iha Palasiu Prezidensiál, Bairru-Pité, foun lalais.

Nia dehan, tinan naruk ona restaura tiha independénsia maibé, dezenvolvimentu sei dook husi maluk defisiensia sira, tanba ne’e sira husu tulun ba Xefe Estadu bele ko’alia ho governu oinsá bele masimiza liután tau atensaun ba Ema ho Defisiensia.

“Tanba ne’e, ami hanoin ho hasoru prezidente para bele hola inisiativa dialogu ho órgaun estadu sira para Orsamentu Jerál Estadu 2023 bele asesivel no inkluzaun liután,” nia dehan.

Nia hatete, Xefe Estadu promete ba sira iha enkontru ka partisipa seremónia formál ruma sei hato’o preokupasaun sira husi maluk defisiensia ba governu, ho objetivu bele buka meiu ida di’ak atu ema hotu iha nasaun ne’e sente moris laiha ida mak sente hela iha kotuk.

“Ami mós husu ba Prezidente Repúblika bele husu ba Parlamentu Nasionál ratifika ona konvensaun internasionál ba direitu Ema ho Defisiensia nian ne’ebé Konsellu Ministru aprova ona,” nia esplika.

Iha biban ne'e, Koordenadór Asosiasaun Esperasan Feto Timor Leste (AEF-TL), Madalena da Costa hatete, iha soru-mutu ho Prezidente Repúblika ne'e lori AEF-TL nia-naran husu halo diálogu ho parte estadu nian atu implementa lei ne'ebé forte ba autor sira ne'ebé halo violensia hasoru feto no labarik feto sira.