Aviaun ne’e sai husi Portugal horiseik Domingu loron 14/03/2021.

Ekipa husi Sentru Integradu Jestaun Krize (SIJK) tula kedas pasajeiru sira ne’e husi Aeroportu Komoro ba kumpri kuarentena ne’ebé governu estabelese ona durante ne’e.

Aliende pasajeirus 241 ne’e iha mós ahi-kaudesan  Timor oan na’in ida  ne’ebé mate iha Portugal iha loron 23 fulan janeiru tinan 2021.

Matebian ho naran Antonio Belo husi munisipiu Baucau hakotu iss tanba sofre moras no antes ne’e halo ona tratamentu iha ospital Darwin Australia hafoin nia ba Portugal.

Nune’e to’o iha Portugal matebian kontinua hala tratamentu iha ospital Garsia de Horta Portugal to’o matebian rekopera no deside atu fila mai Timor-Leste.

Maibé iha momentu atu fila mai la konsege tanba iha situasaun Covid-19 no matebian kontinua hela iha Portugal to’o nia hakotu iss.

Dadaun ne’e ahi-kaudesan matebian Antonio nian entrega ona ba familia sira no lori ba ninia residensia Bairu dos Grillos Dili, molok lori ba  Baucau hodi halo prosesu funebre tuir kultura munisipiu Baucau nian

Entretantu tuir preokupasaun públiku balun ne’ebé online Independente asesu iha media sosial hatete, vida pasajeiru ema estranjeiru no timor-oan balun ne’ebé foin tula mai la importante liu vida nasaun no povu maioria iha rai laran.

Tuir lolos Governu tenki konsistente ho desizaun ne’ebé foti ona relasionadu Covid-19, aplika serka sanitaria no konfinamentu obrigatóriu, no taka liña fronteira hotu-hotu ne’ebé posibilidade bele transmite moras Covid-19 mai Timor-Leste.

Maibé realidade Governu kontinua loke aeroportu Dili ba ema ne’ebé lolos tenki hakmatek iha ida-idak nia fatin too Timor-Leste livre husi moras ne’e.