Tuir Ministru Prezindensia Konsellu Ministru, Fidelis Leite Magalhãens hatete, hafoin análiza aprezentasaun husi Sala Situasaun Sentru Intergradu Jestaun Krize, kona-ba pontu situasaun husi SARS-CoV-2 iha país, Governu deside ona atu prolonga tan serka sanitária ka konfinamentu obrigatóriu iha Munisípiu Dili, oras 23:59 loron 2 fulan-abril.
“governu deside prolonga tan serka sanitaria iha kapital Dili to’o oras 23:59 loron 2 fulan abril 2021," dehan nia iha salaun Ministeriu Finansas.
Nia esplika, regra jeral katak sidadaun hotu tenki hela iha uma, bainhira sai enkuantu iha nesesidade urjensia hanesan, ba sosa hahan, sosa pulsa ahi, pulsa internet no hola nesesidade baziku sira, no mós servisu sira ne’ebé esensial.
Nune’e regras ne’ebé presiza atu halo tuir nafatin mak hanesan, fase lima bebeik, uza maskara, labele halibur malu, distansiamentu sosial kuaze metro 1.5 no labele sai bainhira la nesesariu.
Antes ne’e Konsellu Ministru deside serka sanitaria dahuluk iha loron 8 fulan-marsu, oras 00:00 to’o loron 15 fulan-marsu, oras 23:59. Bazeia ba rezolusaun governu lei numeru 12/2021, loron 8 fulan-marsu ne’ebé impoin serka sanitaria no konfinamentu iha munisipiu Dili.