Asegura Vasina Pfizer, UNICEF Entrega Jeleira Ultra-Malirin Haat ba MS

By Grigoriu da Costa Outubru 18, 2021 313
Reprezentante UNICEF hamutuk ho ekipa entrega Jeleira Ultra Malirin ba Ministra Saude, Odete Maria Freitas Belo. Foto:Grigoriu/INDEPENDENTE. Reprezentante UNICEF hamutuk ho ekipa entrega Jeleira Ultra Malirin ba Ministra Saude, Odete Maria Freitas Belo. Foto:Grigoriu/INDEPENDENTE.

DILI: Fundu Nasaun Unida ba Labarik (UNICEF-Sigla ingles) entrega jeleira ultra-malirin haat ba Ministeriu Saúde (MS) hodi armazena vasina Pfizer BioNTech ne’ebé presiza armazenamentu ho temperature grau selsiu negativu 86.

Reprezentate UNICEF iha Timor-Leste Bilal Aureng Durrani hatete, armazena no transporta vasina sira ho temperatura lolos mak fundamental atu salva labarik no adultu sira husi moras potensialmente fatal.

Ho nune’e, UNICEF orgullu hodi apoia Timor-Leste tinan hirak ne’e, liu husi instalasaun sistema korenti-malirin iha país ne’e ba imunizasaun rutina no mós ba vasinasaun Covid-19.

“Ita eleva ona kapasidade korenti-malirin iha país ne’e ba nivel aas ho instalasaun sistema korenti ultra-malirin ba primeira vez. Hahú husi SAMES, ita sei habelar gradualmente sistema korenti-malirin ba parte sira seluk iha país ne’e.” dehan nia iha komunikadu ne’ebé ne’ebé Online INDEPENDENTE asesu, segunda ne’e (18/10). 

Aleinde, UNICEF mós sei hola tan frigorifiku temperatura ultra-malirin adisional 16 ba Ministeriu Saúde, ho fundus husi Governu Australia. Enkuantu, frigorifiku sira ne’e sei instala iha armazen rejional sira, atu permite governu armazena vasina sira mak presiza temperatura ultra-malirin besik ba ospital rejional sira no sentru saúde munisipal sira, no reduz tempu no kustu transportasaun vasina sira husi Dili ba sentru saúde sira.

Entretantu, vasina Pfizer BioNTech doze 100,620 lote dahuluk to’o ona iha país iha loron 16 Outubru tinan 2021.

Ministra Saúde, Odete Maria Freitas Belo hatete, UNICEF sei apoia Ministeriu Saúde ho SAMES halo instalasaun ba manutensaun no atualiza sistema armazenamentu korenti malirin.

“Frigorifiku sira sei ajuda ita armazena ho seguru vasina Pfizer BioNTch sira ho temperatura lolos, no permite ita atu implementa kampaña vasinasaun ba labarik sira tinan 12 to’o 18 mai kraik.” dehan Odete.

Enkuantu, apoia ida ne’e, hanesan ba dahuluk Timor-Leste iha kapasidade hodi armazena vasina ho temperatura ultra-malirin. Hahú to’o mai kedas iha país iha loron 22 fulan Setembru, UNICEF servisu hamutuk ho Ministeriu Saúde, SAMES no fabrika atu garante katak país ne’e prontu hodi simu vasina Pfizer BionTech.

 

Asistente Editor: Saturnina da Costa

Rate this item
(0 votes)

Independente Digital TV