Akademiku Apresia Ho Kalbuadi Nia Esforsu Featured

By Tomas da Cruz Novembru 20, 2023 1236
Ekonomista Universidade Dili (UNDIL), Alfredo dos Santos. Foto:Google. Ekonomista Universidade Dili (UNDIL), Alfredo dos Santos. Foto:Google.

DILI: Ekonomista Universidade Dili (UNDIL), Alfredo dos Santos apresia ho esforsu, Vise Primeiru Ministru, Ministru Koordenador Asuntu Ekonomiku no Ministru Turizmu no Ambiente, Francisco Kalbuadi Lay kona ba atu realiza forum bisnis internasional, tanba liu husi dalan ne'e investor sira bele mai halo investimentu hodi dezenvolve setor ekonomia.

Nia haktuir, durante tinan naruk povu Timor Leste sempre halerik tanba dependente de'it ba sasan importasaun, tanba produsaun iha rai laran menus.

Produsaun rai laran menus tanba investimentu husi setor privadu menus, investimentu eksternal ka husi rai li'ur ladun mai hola parte iha dezenvolvimentu ekonomia Timor Leste nian.

"Kuandu iha hanoin ruma kona-ba oinsa realiza bisnis forum, ha'u hanoin katak ida ne'e hanesan asaun ne'ebé durante ne'e ita seida'uk halo. Ha'u hanoin katak ne'e pozitivu tanba bele fo vantajen di'ak," informa Alfredo ba jornalista INDEPENDENTE liu husi via telephone, (19/11).

Nia argumenta, maski planu ne’e foin inisiu, maibé liu husi dalan ne'e bele atrai investor mai partisipa hodi hato'o sira ninia hanoin, inklui rona mos hanoin balun husi emprezariu Timor oan, nune’e iha futuru bele mai investe hodi hadi'a di'ak liu tan ekonomia nasaun ne'e nian.

"Ida ne'e inisiu, prosesu sei naruk maibé ita fiar katak inisiu ida ne'e (forum bisnis), depois fo ezemplu (oportunidade) ba setor privadu hola parte masimu, ha'u hanoin sei fo rezultadu di'ak," nia hakotu.

Molok ne'e, Vise Primeiru Ministru, Ministru Koordenador Asuntu Ekonomiku no Ministru Turizmu no Ambiente, Francisco Kalbuadi Lay informa, nia parte sei servisu hamutuk ho Kamara Komersiu no Industria Timor Lorosa'e (CCI-TL) iha tempu badak sei realiza forum bisnis internasional sei foka liu kona-ba ekonomia.

"Ohin ha'u mai relata ba prezidente repúblika asuntu tolu hanesan ita bo'ot sira hatene katak hahu hosi 23-25 hosi ministeriu koordenador asuntu ekonomiku sei organiza hela forum bisnis internasional durante loron tolu, no sei foka liuba ekonomia ne'e uniku asuntu, ne'ebé sei partisipa hosi emprezariu lubuk ida liu-liu Asia Pasifiku, Xina, Korea, Japaun no sira seluk," informa Vise Primeiru Ministru no Ministru Koordenador Asuntu Ekonomiku no Ministru Turizmu no Ambiente Francisco Kalbuadi Lay hafoin ramata enkontru ho xefe estadu Jose Ramos Horta iha palasiu prezidensial Bairrupite-Dili, Tersa (14/11).

Dehan nia, servisu hamutuk ho Kamara Komersiu Industria Timor Lorosa'e, no nia hanesan orientador no koordenador jeral, no vise Jorge Serano hamutuk ho nia ekipa tomak fatin atividade iha GMN Bebora.

Nia hatete, se iha forum ne'e mak konsege hetan akordu asina entre emprezariu nasional no mos emprezariu sira mai hosi rai li'ur.

Rate this item
(0 votes)
Last modified on Segunda, 20 Novembru 2023 12:07

Independente Digital TV