Diretora ADRA, Virginia Pycroft hateten, projetu Hakbiit Feto marka tán istória importante ida liuhusi asina akordu ba sub-grant ida ho Organizasaun Sosiedade Sivíl  ne’ebé foku ba feto sira hamutuk haat, atu empodera feto sira iha Timor-Leste.

Organizasaun Sosiedade Sivil ne'ebé ADRA asina akordu mak hanesan Fundasaun Esperança, Fundasaun Kolegas da Pas, Fundasaun Haburas Moris no Centro Nossa Senhora do Rosario.

“Objetivu husi asina akordu ne'e tanba sira kompleta ona ho susesu Formasaun nu’udár Treinadór kona-bá Eskola Kampu no Klimátika no mós Agro-Negósiu ba Agrikultór sira," nia hateten iha edifisiu Rede feto, Kaikoli, Segunda (15/08/2022).

Relasiona ho ida-ne'e, organizasaun sosiedade sivil  sira sei hetan fundus sufisiente hodi estabelese, treina, monitoriza no halo akompañamentu ba grupu Eskola Kampu no Adaptasaun Klimátika ba Agrikultór hamutuk grupu 15 iha munisípiu Ainaro, Baucau, Bobonaro, no Dili iha tinan 2022.

Grupu hirak ne’e mós sei hetan apoiu materiál báziku ba sira nia atividade agrikultura nian, no mós hetan akompañamentu no monitorizasaun regulár hodi garante sustentabilidade husi atividade ida-ne’ebé bele hetan rendimentu.

Formasaun ne’e sei inklui mós sesaun relevante sira kona-ba asuntu jéneru, prevensaun violénsia doméstika no violénsia bazeia ba jéneru, Sei iha  sistema bee rua mak sei instala iha kada munisípiu. 

Tanba ne'e, Hakbi'it Feto mosu ho objetivu atu hametin kapasidade grupu feto Timoroan sira nian, iha área pratika agrikultura di’ak no ligasaun merkadu.

Entretantu, Formasaun ba grupu agrikultór feto sira sei foku liu ba oinsá hasa’e kuantidade no kualidade produsaun lokál ne’ebé identifika tiha ona, iha peskiza merkadu no mapamentu kadeia de valor nian, hanesan foos mean no metan, fore-rai, batar, fehuk, liis mutin no mean no produtu ortikultura sira seluk, liuhusi aproximasaun adaptasaun klimátika no konservasaun rai.