Xefe Estadu Maior F-FDTL Tenente Jeneral, Domingos Raul ‘Falur Rate Laek’ hateten, durante F-FDTL hetan apoiu formasaun husi nasaun sira hanesan Australia no Portugal, maibe husi nasaun membru ASEAN seidauk ka sei menus.

"Ita tama ba ASEAN  persiza halo preparasaun ne'ebe masimu. Preparasaun mak ami halo buat ne'ebe ita bele halo, ita labele sai hanesan nasaun sira dezenvovimentu, tanba balun ukun aan kleur ona, sira nia sistema mos avansa ona," informa Falur Rate Laek ba jornalista sira iha estadiu Munisipiu Dili.

Nia esklarese, Timor-leste foin mak  harii, tanba ne'e ita labele ambisaun, maibe buka oinsa adapta bainhira nasaun membru ASEAN persiza.

"Se sira persiza ema na'in-10, ita fo ida, ita halo buat ne'ebe tuir ita-nia kbiit. Entaun posizaun ita nia mak fortifika formasaun ba militar sira bain-hira ita adere ona. No ita mos husu membru nasaun ASEAN nian fo kursu formasaun ba militar sira", nia esplika.

Tenente Jeneral Falur konsidera katak, durante formasaun ini sira husi Australia no Portugal mak barak liu, tanba ne'e membru ASEAN barak ne'e tenki apoiu formasaun.

"Agora sira barak ne'e, sira mos tenki apoiu formasaun ba komando militar sira. Ita kontinua aposta nafaitn ba rekursu umanu," nian konklui.