Tuir Diretóra ACbit, Manuela Leong Perreira, hateten, feto sobrevivente hirak ne’e mai husi munisipiu 12 inklui Rejiaun Administrativu Espesial Oekuse Ambeno (RAEOA).
Negosiu ne’ebé feto sobrevivente sira faan mak hanesan, tais, lafatik, bote, sasan dapur nian no mós sasan sira seluk tan.
Nia akresenta, ACbit sei servisu makas liu tan hodi haree ba vitima sira husi konflitu pasado no mós fasilita feto sira hodi hala’o negosiu. Nune’e, sira bele halakon sira nia trauma hodi moris kontente.
"Ita nia feto sobrivivente sira mós presiza halakon sira trauma, presiza moris ho kontenti, ami halo atividade ekonomia ne'e uluk kedas iha ami nia servisu to'o agora iha ona ema na'in 312, ne'ebe halo negosiu ekónomia,” dehan nia iha salaun HAK, Farol, Dili, sesta horseik (10/12).
Ho nune’e, ACbit konvida feto sobrevivente sira mai tuir mós seminar no bazar ida ho tema “Hapara Violensia Kontra Feto no Labarik Feto no Hakbiit Ekonomia Husi Feto Sobrevivente Sira”, ne’ebé hala’o iha salaun HAK Farol.
"Ita konvida feto sobrevivente sira husi konflitu pasadu no mós husi violénsia sira husi munisipiu 12 RAEOA mai tuir seminariu ne'e, hodi lori sira nia produtu lokal mai faan no mós promove iha eventu ne’e, hodi fahe mós esperensia organizasaun nian ba feto sobrevivente sira hodi hala’o negosiu,” hakotu nia.
Asistente Editor: Saturnina da Costa
