26 Setembru: SIJK Rejista Positivu Foun Tun ba 32 Featured

By Setembru 26, 2021 365
Rezultadu hatudu Positivu Covid-19. Foto:Dok. Rezultadu hatudu Positivu Covid-19. Foto:Dok.

DILI: Sala Situasaun Sentru Integradu Jestaun Krize (SIJK) ohin (26/09) relata, ekipa konjunta saúde rejista kazu positivu Covid-19 foun tun ba 32.

Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, kazu foun ne’ebé rejista ohin, iha Kapital Dili numeru boot liu kompara ho Munisipiu sira seluk.

Husi kazu detetadu 32 ne’e, iha Dili kazu 27, Baukau kazu 3, Bobonaro kazu 2, no RAEOA kazu 2.

“Husi totál kazu detetadu foun ohin, kazu 12 ka 37,5% mak hatudu sintomas, kazu 5 ka 16% simu ona vasina kompletu no kazu 13 ka 41% simu ona vasina doze dahulu,”dehan nia iha komunikadu ne’ebé Online INDEPENDENTE asesu domingo ne’e.

Aleinde, SIJK mós rejista pasiente ne’ebé rekupera husi Covid-19 iha na’in 83 no kazu ativu ne’ebé baixa hela iha Izolamentu hamutuk 994.

Enkuantu, total komulativu kazu konfirmadu sura husi loron 21 fulan-Marsu tinan 2020 to’o loron 26 fulan-Setembru tinan 2021 hamutuk 19.382.

Entretantu, husi horseik (25/09) mai ohin teste PCR ne’ebé Laboratoriu Nasional Saúde halo iha Dili hamutuk 102, kompostu husi Vijilansia sentinela na’in 2, Contact tracing na’in 19, Random screening na’in 12, Viajen sai husi serka sanitaria Dili na’in 41, Viajen intenasional na’in 9 no Follow up iha kuarentena na’in 19.

Teste PCR ne’ebé halo iha munisipiu sira seluk, RAEOA no HNGV hamutuk 252.

Nune’e, iha loron 26 fulan-Setembru tinan 2021, Izolamentu Vera Crus, Lahane, HNGV no fatin seluk iha teritoriu laran tomak, halo tratamentu hospitalizadu ba kazu detetadu hamutuk na’in 53, kompostu husi kazu grave na’in 7, kazu moderadu na’in 33 no kazu leve na’in 13.

Rate this item
(0 votes)
Saturnina da Costa

Jornalista Jornal Independente

https://independente.tl

Independente Digital TV